金牛到，恭喜發財，八方祝各位讀者大吉大利，身體健康。今年牛係主角，不過新正頭卻俾肥雞搶晒風頭，因為活雞供不應求，雞價發癲，一隻新鮮大肥雞賣400蚊，而且唔係有錢就買到，搶手程度拍得住跌到50幾蚊嘅滙豐。
去年拜年，大人、細路都問有冇新相、收到「閃卡」未，今年則話不提雞半句多，飲食界議員張宇人無雞不歡，去年禽流感殺雞，個幾月後復售活雞，佢太太一次過買10隻雞慰夫，為免過年冇活雞食，張宇人預早四出張羅，有個禽畜業人士同情佢，特別預留三隻靚雞畀佢。
家禽會會長冇雞送禮
張宇人話多得呢位業界老友雪中送雞，令佢感受到人間溫暖同幸福，否則佢兩公婆可能要四圍撲去街市搶雞，真係諗起都凄凉。雖然有三雞在手，不過張宇人唔會獨食，其中一隻會孝敬母親，其餘兩隻留待開年食。港人食貴雞，張宇人話應該向食衞局局長周一嶽問責，因為局長唔肯加碼入活雞，令特區鬧「雞荒」。
賣花姑娘插竹葉，賣雞嘅都慨嘆食冇雞，活家禽批發商會會長徐名團同八方講，雖然佢買賣活雞無數，不過今年都只係留低六隻自用，團年、開年、拜神都靠晒佢哋，佢話往時過年前會送雞畀人做禮，今年冇雞送，「好多朋友打電話問我有冇雞，我話冇，真係愧對鄉親父老。」徐會長講到悲從中來，話近日都唔敢隨便接電話，「送隻雞畀人都冇，你話幾失禮。」
民主黨李華明都係為食之人，不過佢就話冇興趣逼街市搶貴雞，而且幾百蚊隻活雞，真係太貴嘞，唔係人人捨得食，佢又唔使拜神，所以買冰鮮雞都無所謂。正所謂雞有雞味，好多人認為冰鮮雞味道差過活雞，李華明話覺得唔係差咁遠，因為有專家教佢，最好買風冷冰鮮雞，唔好買用冰水冷卻嘅，因為經冰水浸過肉質會粗嚡啲，不經水浸肉質同鮮雞分別不大。
李華明指風冷冰鮮雞都係貴十元八塊，買邊種豐儉由人，八方希望牛年人人有雞食，唔使捱貴雞。八方新年收爐，休息三日，初五開市。
mailto:[email protected]