新年家家戶戶團圓，幼吾幼以及人之幼更好，前日年廿九，有29個愛心家庭，接待33名來自內地小童，招呼佢哋喺香港住七日，呢班小朋友部份係死囚子女，另有13名係河南愛滋病遺孤，當中8人更加感染到愛滋病。
愛滋病童好懂事
未婚嘅楊小姐係愛心家長之一，佢話一直好關注愛滋遺孤情況，得悉可以接待呢班小朋友，就第一時間同主辦機構正生會報名。
楊小姐接待嘅愛滋小童小磊今年7歲，父親因賣血感染愛滋病死，母親有重病。楊小姐讚小磊好懂事，小磊因天氣亁燥皮膚痕，抓到皮膚出血，主動叫楊小姐小心。
兩個陌生人在港團圓，楊小姐噚日同小磊行花市買新衫，今日會帶小磊去男友同自己屋企拜年，俾佢感受香港過年氣氛，人間有愛，喺邊度過年都一樣。