自駕遊吸財：初一自駕行大運　財色兼收

恭賀新禧！祝牛年大家事事順境，牛市長旺，人人逆境自強、生機處處，學有所長、打工仔短減長加兼分花紅，身體健康，笑口常開，恭喜！恭喜！
據命理師傅方海閱指，牛年九紫飛星入中央，東南財星位、西北桃花星，今日預先行大運，準備雙收，點解係預先？事關未到立春，真正踏入牛年應該係二月四日立春開始，之不過今日跑亦無損意頭，記住吉時出發，仲要揸車跑，如果唔係又點可以跑勻三個大運位，想財又有、桃花姻緣人緣又有，牛年仲唔時來運到，人人財色兼收！

記者：梁美甜
攝影：譚盈傑
Model：Ceci、Michael（StageModels）
資料提供：方海閱師傅

吉時踩東南方吸財

08年金融海嘯，人人荷包大縮水，牛年九紫飛星，喜慶星飛臨中央有利一切喜慶，好似嫁娶、添丁、升職、創業等，即係話想結婚又或者想生牛仔，就必到中央位；而桃花星就入西北、財星入東南。想荷包脹緣運好就齊齊跟跑，當然真係由香港島跑轉新界都幾長途，於是乎方師傅為大家算出三條路線，分別以香港島、九龍半島及新界為點，以東南財位行先，之後再到中央喜慶位，終站為西北桃花位，各位揀啱路線同吉時齊齊出發。路線只作參考，看官當然可以因應個人喜好同需要而自行決定，想去赤柱吸財再去流浮山吸桃花亦得。

■新界財位於東南方嘅荃灣一帶。

先去東南接正財

大年初一無理由齋遊車河，反正大家都放假，不妨闔府出巡，又或者三五好友或二人甜甜蜜都好，溫馨又甜蜜。作為新界人就當然要「北上」，9點鐘出發，第一站跑去荃灣接朋友，市區飲個早茶，若然前晚年三十玩得唔夜，可以早起的話甚至上大帽山川龍嘆山川茶水都得，簡簡單單接個朋友就正財到手。
之後當然係入大埔吸喜慶緣運，坦白講，就算住喺新界都只限屋企一帶，要入大埔真係唔係好熟路，咪講笑，CayenneS車身配備港澳NavigationSystem，唔用等於浪費，最正嘅仲要係SUV車型，人坐得多載物多，全車皮椅夠格調亦相當舒服，新車身選配有AirSuspension，四種程度，可因應需要而升降，跑高速，大段直路又有大大細細彎位，將車身降低之後，加埋選配嘅20吋專屬CayenneSIIWheels，入彎穩定又具高度抓地力。方師傅見黑色Porsche亦直言明智之選，「命格屬木，宜選水屬顏色如灰白藍黑；九紫飛星屬火，流線車型又或者車頭車尾車頂尖起亦有旺運程，CayenneS車身大線條又唔及911、997一類跑車咁流線仲旺唔旺到？「只要部車擁有速度，高速已經可以配合飛星，流線跑車當然相合，就算係外形扮跑車咁具有線條而無速度亦都可以。」4.8公升CayenneS搭配六前速TiptronicS連加減波，最高馬力輸出達385匹，扭力輸出亦可高達283kW，極速每小時250km，當然夠速度喇！

■20吋大輪胎，點樣行大運法都無甩拖。

■新界桃花位處於流浮山一帶。

■車身選配有高級BOSE5.1環迴音響設備，聽住歌行車最爽。

■中控軚環配置齊全而高貴。

■加裝太陽擋，正午都唔怕曬住塊面。

■尾廂加配有電動尾門，一隻手指閂大門。

■車身置有PCM導航系統，唔識都唔怕，車行啫！

■加配AirSuspension，調校行走更見爽快利落。

規格
PorscheCayenneS

引擎：4,806c.c.V8
馬力：385匹
扭力：283kW
傳動：六前速TiptronicS自動波連加減波
查詢：PorscheCentreHK（29262911）

■PorscheCayenneS$1,098,000起

入大埔賞花吸桃花

經由城門隧道入，沿吐露港入沙田再轉入大埔，儀錶板亦可調出導航顯示，閱讀方便又容易，話咁易就入到大埔工業村，之不過好想去海濱公園一帶行吓，尤其係朋友中有肖羊人，「今年羊牛相剋，肖羊屬土，水土相剋易犯水險，宜去多土多紅花地方，有助催旺運程。」連師傅都咁講，11點前由荃灣出發到大埔公園之後，大家都可以休息一下。賞花散步啱肖羊者，屋企長輩亦同樣合適；有閒情逸致嘅話更可以載幾部單車踏下，CayenneS個尾廂夠放有餘。玩得咁上下就要出發去流浮山「採」桃花喇！入得流浮山又點可以錯過出名嘅海鮮呢？大年初一，一早打咗電話Book定枱喇，仲專程同友人試吓少年廚神B哥劉嘉麟嘅手勢㖭！

■喜慶位處於大埔，有對象又恨嫁者就要到中央喜慶位一遊。

流浮山食蠔好事來

沿吐露港公路向元朗方向直駛，經天水圍公路轉入流浮山方向，沿深灣路直行即到，行個大運話咁快就到流浮山。大節當前，當然要試幾味好意頭餸菜，當中梗係唔少得流浮山肥美生蠔喇，香煎金蠔、酥炸黃金生蠔、麻香富貴蝦等。金蠔同生蠔唔同，係最肥美鮮蠔，喺北風中吹曬18個鐘之後再煎香而成，蠔肉帶有點點蠔豉味道但又不失濃郁鮮甜及海水味道，大廚陳師傅仲叫大家沾少少砂糖嚟食，嘩，皮脆肉香，鮮味更突出。
富貴蝦即瀨尿蝦，每隻約8両重新鮮瀨尿蝦都有成尺長，同Ceci前臂有得揮㗎，油泡之後回鑊同香料爆一爆，鮮香惹味得很，滿足。幾日以來狂踩部車仲跑勻西北行大運，足足行成四百幾公里油標指針都未到紅線，仲有幾格油餘，一改既有大車高性能車大咬印象，友人個個嘖嘖稱奇，細想又唔出奇，話晒波子近年積極研慳油引擎，試車幾小時唔覺，踩足幾日就真係好覺，慳油囉！