新年去party，小妹鍾意拎啲細細個嘅clutch，一張八達通走天涯，散紙包當然唔會帶。有晚食完鐵板燒好鬼熱氣，喺附近凉茶舖度買咗碗廿四味，擺個手袋上部機度「嘟」，結果「嘟」咗兩次先成功，正當小妹將杯熱辣辣嘅凉茶放埋口邊時，發現部八達通機印咗張單出嚟，上面唔單止有齊卡number，仲有之前幾次嘅交易紀錄，嘩，咁咪好冇私隱！好彩小妹醒目，即刻攞番張單，唔係畀壞人攞咗唔知會做乜。
第二朝瞓醒，小妹即刻打去畀喺八達通做嘅friendEric度投訴，佢話喎，原來呢個係八達通嘟嘟機嘅新function。因為𠵱家出咗呢部新嘟機，比我哋平時喺7仔見嗰啲細部啲，拍卡位都唔同。如果拍得太快或者拍唔正，部機就會自動列印最近四次交易紀錄，等人可以對番有冇扣多錢。Eric仲話，平時可以去港鐵入面嘅查閱機度睇最近十次交易紀錄，要留底就可以去港鐵客務中心、7仔或者CircleK度print番張，每次收三蚊。
港大電機及電子工程學副教授張星煒話，理論上如果有人拎到個八達通號碼，用嚟做另一張卡，就可以用到張卡入面嘅餘額，若果張卡係信用卡自動增值嘅，風險就更大，不過佢話八達通嘅餘額最多都係得500蚊，冇乜肉食，唔似得信用卡，偷咗都唔可以喺海外用，相信啲不法分子唔會咁得閒做手腳，而且要咁樣複製都唔係咁易。聽到佢咁講，小妹都放心啲。
電郵：mailto:[email protected]
逢周日刊出