中環嘉咸街80年老店永和雜貨舖慘成市區重建犧牲品，年廿九終於光榮結業，八方趁最後機會去幫襯買嘢過年。
老闆關伯話夕陽無限好，呢幾日好多人上門，有啲熟客嚟講聲後會有期，更多攝影發燒友嚟影相留住歷史，舖頭人頭湧湧水洩不通。
關伯透露，舖頭仔雖然唔係乜嘢名店，但都有唔少達官貴人光顧，煲呔未做特首時係客仔，局長周一嶽、自由黨田大少都不時嚟買嘢。佢透露田少幫襯得最多係鹹魚同梅菜，有時更會叫太太嚟買餸。田少住山頂大屋，名車價值連城，估唔到口味咁平民化，唔通日日鮑魚、魚翅食到悶？關伯話永和啲梅菜係正宗惠州特產，由專人醃製，非一般貨色，零舍不同㗎。