送鼠迎牛，好事成雙，往年高官輪流向市民拜年，今年打破慣例，兩個特首打孖上講恭喜發財，煲呔雖然身在美國，但預早拍製賀年短片今日播放；唐英年做署理特首，噚日喺山頂官邸請傳媒食團年飯，今日去安老院探望長者，搶閘拜早年。
煲呔拍外景賀歲
特首賀年短片不外乎行行企企，講聲恭喜，鼠年賀歲片煲呔入廚房偷食油角，唔少人記憶猶新。為免煲呔再次出洋相，今年搞新意思，首度衝出禮賓府，牛年賀歲短片唔用廠景，改為全外景拍攝，男女主角真情演出，不惜工本，應該係近年罕見大製作。
相信係受到阿蘇啓發，煲呔兩夫婦今年去到九龍城辦年貨，去南貨舖買金華火腿，又買海味、生果等，仲有幫襯雜貨舖。購物後，兩人去到老人院派禮物，唔係派火腿、海味，係派之前喺工展會買嘅嘢，煲呔當日豪花萬元血拼，買咗好多中式即食麵、電器等，日前就親自去到老人院送禮物畀長者，又睇老人家打麻雀、寫揮春。
煲呔新年賀詞話中國人過新年特別熱鬧，可惜今年新年氣氛，難免受金融海嘯影響而失色，不過佢話行完街辦年貨後，覺得市道又唔係咁差喎，市面氣氛比預期中好，好多市民好捨得使錢，買到大包細包滿載而歸，佢話相信係因為香港人擅長打逆境波，面對困難都會積極面對。煲呔幾日前先話未來有兩大難關，其中一個係新年後有執笠、裁員潮，忽然又話個市唔係咁差，聽完都唔知佢邊句真、邊句假。
唐唐請食政治雞
煲呔放假去美國避年，政務司司長唐英年以署理特首身份向市民拜年，唐唐噚日宴請記者到山頂白加道官邸食團年飯。八方睇唐唐越來越有特首相，見佢望住官邸個魚池啲錦鯉，就知佢非池中物啦。
全港市民被迫食貴雞，一雞難求之際，八方有幸獲唐唐請食雞，仲要雙起，活宰、冰鮮各一。唐唐問八方食唔食得出兩者分別，八方唔係食家，分唔出，唔似得唐唐食慣好嘢，一入口就分得出。呢隻豉油雞政治味濃，事關唐唐邊食邊硬銷中央屠宰政策，佢話既然大部份人食不知味，實施中央屠宰相信對市民影響不大。
唐唐唔只識食雞，講到紅酒更係專家，而且藏有紅酒數量甚豐，隨時媲美中小型入口商，因此山頂官邸不敷應用，要租用工廠大廈酒窖存放珍藏。
財爺取消紅酒稅後，好多飲家都將存放外國紅酒運返香港，以唐唐藏酒量計，自設酒窖可能更化算。
事實上佢對藏酒好講究，指酒窖要保持恒溫攝氏14度，又話其實自設酒窖最重皮係首筆裝修費，之後日常開支有限。
mailto:[email protected]
