港股在鼠年最後一個交易日跌市收場，股友忙於「年廿八，洗邋遢」，兼且外圍股市麻麻，大市成交疏落，唔夠340億元，恒指以12578結束鼠年，較上日跌79點。以往不少散戶慣性買些少股份「責」年，一方面貪個「倉」有股票，代表有餘錢投資，即係「富足」，另外，亦可博年初四港股紅盤高開。但今年唔多見有散戶咁做，明顯對後市有戒心。
牛年投資策略，星俠除維持首選國企股外，個別對大陸經濟較敏感股份都係留意之列，因環視全球，無乜國家今年可保經濟增長，而中國無論能否「保八」，始終都有一定增長，已比其他市場為好，希望循此思維捉路，牛年炒股能有理想回報。
50日線有支持
其中一隻心水係深圳國際（152）。深國去年增持至全資擁有西部物流園後，與鄰區公路網絡配套相連，物流樞軸的協同效應可謂發揮極致，加上深圳集箱裝碼頭收費於大中華圈出名廉宜，未來競爭力不容忽視。
經濟放緩，料深國08年全年盈利難免倒退。該股自年初高位0.40元反覆調整，假前續跌1.6%，收0.305元，惟跌近50日線暫見支持，已反映有關利淡因素。可耐心候低至0.25元左右才收集持中長線，獲利目標0.50元。
方星俠