新春佳節，小弟一家就好鍾意聚埋一齊賭番兩手，大細、魚蝦蟹外，最開心都係玩射龍門，尤其見到人哋抽到煙士同Q，都可以射中柱，全場起哄嗰種高興法，真係與別不同；今次又推介大冷過關，希望可以為大家開心過新年。
荷甲重開，又係扒冷膽嘅球迷好機會；較特別係烏德勒支主場對鹿特丹斯巴達，兩隊唔算荷甲名牌球隊，但竟然都將大細中位數定喺3.5球，似乎馬會對開大有信心。翻查往績，烏德勒支都有大炒鹿特丹斯巴達紀錄，上季贏7個1皮開出主其他，不過今次主其他太熱，博個再冷啲嘅5:1波膽，有50倍㗎！
西甲嘅西維爾確實令小弟又愛又恨，上仗領先2:1之下，竟然反輸畀華倫西亞，累積都輸咗兩口盤；不過呢班波一冇人信就嚟料，主場對住大勇嘅桑坦德，主W竟只得1.55倍，似乎對西維爾大勝有信心；一於再博西維爾同上季一樣，再以4:1大勝桑坦德，有26倍。
愛隊阿仙奴近期有番起色，尤其前鋒艾廸巴約識入波，整隊攻力都提升番好多；以目前英超形勢，爭標已名存實亡，反而雲格對爭英足盃好認真，阿仙奴4連勝當中，有2次開出3:1，無懼作客英冠球隊卡廸夫城，冧莊要多次3:1，12倍唔算太冷，不過過到2、3口，乘埋就好和味。文：牽牛