日有所思，真係夜有所夢。一班政壇新丁同元老噚日聚首一堂，出席港台節目向市民拜早年。新丁之一嘅公民黨陳淑莊向馬丁求教，話做議員工作繁重，點樣先可以瞓得少、做得多，陳淑莊講到七情上面，表示由於自己可能經常同「好打得」嘅發展局局長林鄭月娥交手，有時會夢見林鄭，午夜夢迴都覺得不可思議。
馬丁話驚就最好兩份，既然公民黨有咁多大狀，陳淑莊大可考慮同其他人分工，又透露自己爭取休息時間養生秘訣，就係搭地鐵時做「柱男」、「柱女」，挨住支柱企喺度瞓覺；前高官平叔則話陳淑莊唔算慘，總好過夢見林瑞麟。
政壇元老嘆未有普選
馬丁、飛哥等政壇元老，歲晚憶舊慨嘆等咗幾個牛年，都未等到香港有普選，希望下個牛年會實現夢想，飛哥更話創立自由黨時，以為香港回歸後就有普選，發夢都估唔到仍未成事。
平叔則話自己好好彩，做官時冇做過違背個人理念嘅事，「起碼未處理過政改先啦。」飛哥噚日又話，早前有個80歲長者同佢講，民建聯全部議員都係垃圾，李慧琼係例外，在場嘅李慧琼聽到喜出望外。