中國人一向重視農曆新年，尤其是一家團圓齊人食團年飯，正是民以食為天，今年無綫劇集《學警狙擊》一眾藝員，在苗僑偉（三哥）一聲號令之下，召集江若琳和吳卓羲等人嘆年夜飯局，江若琳坦言新一年恨拍拖，希望有人錫自己。
苗僑偉在灣仔一拖五撐枱腳提早團年，這五個「大唔透」分別是吳卓羲、江若琳、陳鍵鋒、梁嘉琪及林子善，席間眾人品嚐了六道極好意頭的菜式，包括名揚四海、嘻哈齊歡笑、大鵬展翅、大地回春、花開富貴及發財又好市，價值約2,688元一席，大夥兒為這席菜改名「三哥賀年飯局」，美食館老闆更以三哥做生招牌，在新春期間推出這些菜式。
年收千元利是
席間吳卓羲和江若琳變身頑皮一族，江若琳將生菜包放在吳卓羲頭上，吳卓羲則自玩將生菜包放在眼前，面對百厭星的三哥一於冇你咁好氣，為食至上，三哥說：「年年都準備萬元利是，我最鍾意過年，因為過年最有氣氛，今年願望梗係望《學警狙擊》收視爆燈啦！」
江若琳透露每年利是進賬大約過千元，不過通常會上繳中央交給媽咪，她笑說：「其實係媽咪袋晒，佢都冇畀番我嘅，但係我都有派利是習慣，都派成千蚊㗎，支出同收入好平均，牛年嘅願望係多啲工作，有時都恨拍拖，做女仔冇乜嘢要求，只係想有人錫吓，不過愛情係調劑品，我𠵱家會揀事業先。」
在《學警狙擊》中與江若琳演一對小情人的吳卓羲，自言今年犯太歲，稍後他會去攝太歲，希望牛年順景。屈指一算，吳卓羲加入無綫已十年，眼見黃宗澤和林峯歌視雙線發展理想，他覺得一切隨遇而安，他說：「每個人都有高有低，高嘅時候要謙厚，低嘅時候要去學習，不過要有鬥心，一定會追番嘅，呢行唔會永遠只有一個吳卓羲，最好百花齊放，我係無綫第一個藝員出唱片，大家一齊去打拼，我都覺得自己有進步，因為一山還有一山高。」
奉獻螢幕初吻
近日積極求翻身的吳卓羲，實行要做緋聞絕緣體，他笑說：「我同容祖兒合作都冇事，𠵱家同胡杏兒、楊思琦都冇事。」
此外，陳鍵鋒與梁嘉琪在劇中扮演情侶，嘉琪還將螢幕初吻獻給陳鍵鋒，她大讚陳鍵鋒體貼，又謂獻吻給靚仔沒所謂。陳鍵鋒也反讚嘉琪好學，他說：「新人演戲比較緊張，所以有時留喺廠睇吓佢，嘉琪好幸褔，因為周海媚同江若琳都好錫佢，佢哋仲成日約埋去行街，好似姊妹咁好。」
場地提供：益新美食館
江若琳MakeUp：諺瞳小白（PicturesGate）
Hair：JamesLee（Hair）
