唔少立法會議員唔連任之後，就算仲有公職喺身，都唔會再出工作報告，但最近連行會都冇做嘅立法會前保險界代表陳智思，就仍然好勤力咁，繼續定期出版工作報告，交代佢喺人大入面嘅工作情況。
記得當日佢選人大時同八方講，唔想做一個每年只開一次會、得閒就去內地考察，但市民卻唔知佢做過乜嘅港區人大代表，所以當選後會堅持交代工作，好似舊年人大開會，佢以個人及聯名方式，提交三份涉及港人內地非婚生子女戶口、農工子女教育、以及支持社企嘅議案，後來民政部覆信答覆佢，佢就喺今期工作報告交代，雖然回覆只係官樣文章，但起碼畀市民知道佢有做嘢，其他港區人大喺呢方面，好似交白卷。