轆Book：玲玲鼓勵　本命牛有機換靚車

本來想問玲玲姐，乜嘢生肖配乜車會好運啲，但師傅斬釘截鐵答：「無㗎喎！」玲玲有更佳建議：「不如講吓各生肖揸車買車，有乜宜忌好過喇。」最特別係屬本命年嘅牛，雖犯太歲，財運卻會提升，好大機會換靚車。」金融海嘯都換靚車，車行聽到開心死。

記者：徐影龍

深淺赤石遇貴人

未入正題前，先問玲玲12生肖都啱用嘅話題，就係今日年三十晚，揸車點行會好運啲？「今年正南有貴人，正東就遇財神。」望住地圖度一度，即係由銅鑼灣入香港仔隧道，直去深水灣、淺水灣、赤柱同石澳，再由柴灣走，咁就遇齊貴人同財神。咦？今晚走深淺赤石可能會遇到James、海棠班甩尾王。

■今晚深淺赤石順住行，再由柴灣走會遇齊貴人同財神。

牛　事業財運提升

有歲駕星照住，代表事業及財運都有大躍進，而且心思思想換車，所以今年好大機會買更靚更貴嘅車，但要提防粒劍鋒星，易受同金屬有關嘅傷害，換車唔緊要，但揸車都係小心啲。由於牛屬本命年，會有啲阻滯，如追唔到巴士等。犯太歲生肖對揸車人士嚟講無乜好做，都係攝太歲最實際。

■牛仔牛女好大機會換車，但受劍鋒星影響，要小心揸車。

虎　桃花佳遊車河出擊

有太陽星、紅巒星照住，所以買車搵男經紀會好啲，而今年都係一個桃花好旺嘅年份，所以想識多啲女仔，甚至邀約一齊遊車河，成數機會高好多，放膽表白喇。

■就算你唔屬虎，但揸架拉利嘅話，相信約靚女遊車河都無乜難度。

兔　易受傷車要硬淨

今年無吉星照住，所以揸車對自己無大幫助，例如轉工就唔好揀做司機。最要小心係較易會受傷，就算買車，最好都揀番車架穩陣、安全氣袋又多嘅車喇。

■Benz出名鋼水好，安全氣袋Cover又足夠，屬兔人士諗諗佢。

龍　避免夾錢買車

今年有太陰星，如女性朋友送車畀你，又或經女Sales買車會着數啲，留意今年可能出現錢銀瓜葛問題，盡量唔好同人夾份買車，又或供車位，就算老婆都係咁話。

■買車、租車都係經女性會好啲，呢點我不嬲都同意。

蛇　小心惹人抄牌

有代表進步嘅星照住，理應車道暢順、無乜阻滯，不過要小心官符星，代表好易俾人抄牌、犯官非，今年要小心啲，超速、違例泊車都唔好抱僥倖走甩嘅心態呀。

■蛇仔今年好惹咖啡大哥大姐，超速、違泊可免則免。

馬　買零件飾物破財

小號星屬細破財星，所以對揸車人士黎講，今年會使多好多錢，例如密密換小零件、小飾物等呢類無謂嘢。要盡量忍手喇，經濟唔好，錢要儲番啲好呀。

■講到破財即時想起EO2嘅Eddie，單係裝盞水晶燈已夠無謂。

羊　小心交通安全

今年冲正太歲，麥師傅特別強調一眾羊仔羊女，道路交通安全要超小心，揸車、過馬路都係咁話。好大機會要搬屋，可能因此要煩惱埋車位嘅問題。

■因搬動而帶嚟車位問題，計劃買樓人士要留意。

猴　唔好買貴車

貴人運好強，今年會好開心，不過整體大上大落，有三更窮五更富嘅寓意，就算有錢都唔好使盡買太貴嘅車，否則轉頭要換番架錢七，咁就無癮。

■平貴各有定義，按玲玲揸BenzS320級數，應該去到林寶、拉利先叫貴。

雞　不宜揸車，更要避水

今年運程不俗，但不適宜揸車，且犯水險，除咗唔好揸水上電單車外，同海邊有關嘅活動如船P、釣魚等統統都要SayNo，連遊車河去海邊吹風都唔好。

■肖雞忌水，揸車去遊艇會都唔好咁貼海邊。

狗　多人出入買大車

有屬開心嘅星相照，今年會有好多親戚朋友間嘅聚會，經常一班人車出車入，所以應該揀啲載得人多嘅車款，七、八人車款就最啱使，DogSeat類就唔好買喇。

■七人車呢幾年紅到發紫，就算唔教都好多人會揀佢。

豬　驛馬星動旅行車啱晒

驛馬星強勢，所以豬仔豬女今年走動會較多、較大，若有機會買車嘅話，應該揀旅行車款為主，最好尾廂夠大兼有四驅系統，方便肖豬人士周圍去，去機場要攞多啲行李都啱用啦！

■雖然旅行車並非真係旅行用，但襯番粒驛馬星特性都啱晒Key。

鼠　出車郊遊抗病符

由於歲合病符關係，今年肖鼠之人嘅健康運較為麻麻，遊車河時應該多啲揀郊外地點，呼吸多啲新鮮空氣，揀凌志呢類有埋空氣過濾系統嘅車就啱晒。

■要呼吸新鮮空氣，最好買架開篷車，兜口兜面吸到夠為止。