由細到大都對甲蟲有份莫名親切感，全身黑到發光簡直型爆，除在日本卡通中經常出現外，更據聞甲蟲是好戰分子，如兒時經常玩的金絲貓般一樣打得。今次親眼目睹，方知甲蟲真的好鬥，面對體形比自己大的「同類」，照樣裝兇作勢。
記者：蒙為亮
攝影：梁細權
長頸鹿鋸鍬形蟲 每對$800
身長：約110mm
性格：貪玩，好戰，放隻塑膠甲蟲入缸，牠不怕身形比自己大的假同類，照樣豎起兩隻鉗，擺出對打姿勢，天生暴力狂。
戰鬥指數：★★★★★
極太DHH長戟 每對$1,800
身長：約135mm
性格：極好勇鬥狠，一完成交配，隨時獸性大發，打死雌性甲蟲。
戰鬥指數：★★★★
彩虹鍬 每對$550
身長：約60mm
性格：比較溫馴平靜，不輕易咬人，顏色非常漂亮。
戰鬥指數：★
佐賀產日本大鍬 每對$900
身長：約75mm
性格：溫馴，行動比較緩慢，吃食物也滋滋油油。
戰鬥指數：★
庫拉特細身 每對$700
身長：約55mm
性格：外表兇惡但甚膽小，全身長滿短毛，愛匿藏。
戰鬥指數：★★
黃金鬼 每對$580
身長：約75mm
性格：孤獨，顏色全金，不多郁動，可以長時間蟄伏一旁。
戰鬥指數：★★
基兜 每對$98
身長：約60mm
性格：也是好戰分子，不過體形有限，只會挑戰同級別對手。
戰鬥指數：★★★★
台灣人起外號最傳神
還記得兒時玩的金絲貓，有紅孩兒、牛魔王等帥氣名字，甲蟲也有型格稱號如黃金鬼、極太DHH，開舖7年的阿偉笑言這些稱號不是自己改的，是根據台灣方面的養甲蟲專家改的：「我喺日本入貨，但講到譯日文最傳神始終都係台灣人，絕大部份甲蟲稱號都係台灣人改嘅。甲蟲品種繁多，世界上有60幾種兜蟲同1,500種鍬形蟲。」鍬形蟲？我立時一句：「阿米巴變形蟲啲Friend？」「哈哈，當然唔係啦，平日買返屋企養嘅甲蟲分兜蟲同鍬形蟲，大家最熟悉嘅獨角仙，就係兜蟲嘅一種，鍬形蟲頭部有兩隻鉗，兩種蟲都以食樹汁即甲蟲啫喱為主。」
甲蟲知識，靠平日辛苦看書累積，阿偉：「小學開始，我已經好鍾意上科學堂，唔知點解，特別鍾意睇昆蟲標本，尤其係甲蟲，因為甲蟲個Look好有型。大個咗出嚟做嘢，上上吓網發覺香港原來有唔少甲蟲Fans，所以就決定開舖頭，去日本入貨，自己過到癮之餘又可以同班志同道合交流心得，都幾開心㗎。你知啦，養甲蟲唔同養貓狗，因為真係比較另類。」
好戰分子=交配王
聽說甲蟲打架會打到天昏地暗，阿偉贊同：「打親交都唔係人咁品㗎，只要放兩隻雄性甲蟲一齊，佢哋一定會打到對方爛身爛勢為止，甚至夾生打死對方。」他語重心長地表示，養甲蟲應以寵物看待，牠們不是蟋蟀不是金絲貓，別以打架為樂，「自己養甲蟲差唔多十年，試過一次亦係唯一一次專登俾佢哋打交，我覺得好殘忍。𠵱家開舖頭，每一次賣甲蟲畀啲新手，我都會勸佢哋唔好養嚟打交，成年甲蟲生命只得一年多啲，多啲同佢哋玩吓仲好啦。」
一年壽命這麼短？幾百元買隻甲蟲豈不浪費？「一啲都唔浪費，甲蟲除咗好戰，仲係天生交配王，我會一對一對甲蟲咁賣，一夫一妻咪可以繁殖囉，有時一胎有差唔多100隻幼蟲，太多幼蟲啲客仔養唔晒，多到要賣番畀我。」甲蟲係完全變態昆蟲，生命必須經過卵、幼蟲、蛹及成蟲四階段，「大多數品種每年產一次卵，有啲品種要等3年先產卵，佢哋完成交配使命，就會上天堂。」聽他解釋，如看了一集《DiscoveryChannel》，飼養甲蟲，真的少點學問也不成。
每月飼養費$100
養甲蟲如養普通寵物，最重要的是愛心，定時定候餵食，不用多加照顧，飼養費用也不高，「每個月差唔多$100啦，買齊昆蟲用木碎、甲蟲專用Jelly已經搞得掂，一啲都唔難養。」甲蟲壽命雖短，但屍身也有價值，阿偉說：「甲蟲標本有市有價，品種越稀有價值越貴，價錢大概係在生時候嘅五分之二，咁當然，製作標本又係另一個技巧。」說罷，他向我訴說製作技巧，恍如科學科老師教學生用浸製法做標本一樣，眼前的阿偉，霎時變了偉Sir！最後，我忍不住問他：「其實你又鍾唔鍾意曱甴呢？我覺得……甲蟲同曱甴，個樣其實差唔多……」阿偉大反應地叫：「咪搞，我好驚曱甴……哈哈。」
《甲蟲王者》煲起甲蟲熱
甲蟲必須經卵、幼蟲、蛹、成蟲四個生命階段，當天氣回暖，幼蟲會停止進食，把身體內的糞便全排出來，並分泌黏液製作蛹室，靜待一段時間甲蟲就會破蛹室而出，尋找樹液及異性交配，完成交配使命就回歸極樂，冬天來臨，整個生命循環亦隨之完結。上年11月播映的《甲蟲王者》，故事講小兜蟲與小精靈寶寶在森林對付壞甲蟲，帶動了一股飼養甲蟲熱，很多小朋友都紛紛養甲蟲做寵物。
蟲樂坊（61098430）
地址：旺角洗衣街24號興業樓1樓後座
網址： http://beetlesland.com
必備四寶
皿木$20-$25
甲蟲棲息之所，盡量營造大自然環境，甲蟲可以安心休息。
甲蟲自育書$280
鈴木知之著《世界鍬形蟲‧兜蟲飼育圖鑑大百科》，初哥可靠這書無師自通，阿偉：「睇得書多，自然識得養兼養得好。」
昆蟲用木碎每包$40-$70
甲蟲慣在森林活動，會鑽泥土，買一包昆蟲用木碎供牠們棲身，盡量模仿大自然環境，牠們才會住得舒適。
甲蟲啫喱$90
甲蟲主糧是樹汁昆蟲，一日一盒小啫喱，已可養活牠們。
三大注意
1.甲蟲怕光，慣在黑夜的森林活動，別放牠們在燈光猛烈的地方，因為牠們會渾身不自在。
2.別忘記甲蟲是有翅膀的，切記蓋好缸子，否則甲蟲就會表演一場消失Magicshow。
3.甲蟲有一定攻擊性，如被牠們咬着不放，即時放牠們入水，牠們就會鬆開口。