年近歲晚，人人想食雞，秘書V到九龍城街市買雞，買一隻雞要一百六十五元，而且要衝埋去搶雞。雞販對佢講：「到咗年廿八、廿九、年三十晚呢三日，講唔埋要二百至三百蚊一隻雞。」秘書V嘩一聲，問點解要咁貴，雞販話：「你哋去問周一嶽啦，佢唔准放多啲活雞入嚟吖嘛！」
點問喎，或者周局長最鍾意食冰鮮雞呢！香港人食雞最尖嘴，無活雞不歡，此乃真正廣東人文化也。秘書V入廚無活雞嘅話就不願炮製白切雞、豉油雞或貴妃雞、鹽焗雞等。吃冰鮮雞，佢話走落去KFC買就得啦，使乜佢整？呢日佢在九龍城搶雞，搶到兩隻，十分高興，點知返到街邊汽車泊位，不禁慘叫一聲，因為咪表過時，已收到咖啡人送來牛肉亁，盛惠三百二十元，相等於兩隻雞，唔肉痛就假。九龍城一帶，泊車甚艱難，街市附近，經常出現三行泊車，擠塞異常，僥倖佔到一個車位而吃牛肉亁，運氣都冇晒。點解畀人抄牌？秘書V投訴後不得要領，但搵到原因，就係以八達通泊車，往往中招，一張卡拍埋去咪表處「確認付款」，有時以為「嘟」咗，實際上冇「嘟」到，心急鬆人嘅話，往往中招，呢日秘書V就係買雞心切，冇留意到自己之八達通雖然拍咗一下，但未「過水」畀運輸署，因而畀咖啡人巡邏隊捉到正。
左丁山亦試過趕搭火車頭等，在尖東站拎出八達通向頭等車卡外之八達通機拍咗一下，就跳上火車，火車立即閉門開出。過咗九龍塘，有稽查查飛，查出左丁山之八達通冇「嘟」過，有搭霸王車之嫌，於是到咗大圍站就畀兩名稽查請出車外，查身份證、罰款（好似係五百元，唔記得清楚），當時肉痛到極，因為五百元已夠從中環搭的士行西隧經尖山隧道到馬場，再返回中環！
嘟唔到機，可以發生不愉快後果，無從申辯，投訴無門，可算係冇運行之事，自己唯有力求小心！尤其是係去到九龍城街市附近泊車！建築邦有時怕九龍城太多人，周末時分特別揸車到大埔街市買餸，點知畀佢無意之間發現一間餅店成日有人在門外排隊，佢諗住實係有好嘢，於是排埋一份，原來係賣蘋果批嘅，試過之後，讚不絕口，靚師奶T最鍾意食蘋果批，聽到之後，話不惜揸車由中環半山殺入大埔排隊買番啲喎！