民建聯議員李慧琼雖然已為人母，但仍然好貪玩，噚日行年宵，花68蚊買咗個巨型吹氣雞蛋仔玩具，拎埋返立法會玩，公民黨陳淑莊見到大讚kawaii，兩個人拎住底巨型雞蛋仔喺度玩，童心未泯咁款。
政客好似必須寫得一手好書法，否則新年時少好多曝光機會，李慧琼都臨急抱佛腳速學書法，估佢唔到，師傅竟然係陳克勤。八方聽聞陳克勤習字有年，水平如何八方不敢講，李慧琼則話佢初拜入門，由低學起，先學寫最簡單嘅「大吉」，苦練一段時間，有人話已同陳克勤水平相若，果然青出於藍。
民主黨張文光新年假期會同老婆去伊朗旅行，佢話行程好新鮮特別，但係入鄉要隨俗，全程唔可以公開同老婆拖手仔，太太出外時又要披面紗，唔係幾慣。