臨近新年，媽子就會：「我想去西環XX買海味、九龍城YY買亁貨、荃灣ZZ買瓜子糖果……」
初一，媽子又會：「去拜年囉，要去天水圍姨婆、東涌大家姐、屯門大表哥、柴灣叔公……」
嘩！做「伸手派」要短加長減，單係辦年貨由葵涌跑轉西環都已經百七，買勻一定過千；過年闔家六、七人出發，咪隨時要叫兩部的士？橫豎硬使幾千銀，不如自主話晒事，一次租部MPV，跑勻全港，方便又舒服！
記者：梁美甜
攝影：林栢鈞
模特兒：Kitty、Joe、Helen、Amy、Edmond（TheGroup）
三大行格價 MPV春節精選
近年大熱車款絕對係MPV七、八座多功能車，無法喇，大部份MPV內櫳都有番咁上下闊落，Size健碩嘅猛男烈女，又或者上咗年紀長輩都唔會嫌逼嫌上落唔方便，最重要係車身可以坐5、6、7或8人之外，仲一定有空間擺嘢，至啱過時過節人多載物又要多嘅時候用。問心，香港租車公司真係唔少，若然閣下有相熟嘅話就最好，如果唔係，都係搵大行幫手，話晒經驗、信譽同質素有保證，有乜唔好彩，追起上嚟都容易啲。今日喺三間規模、信譽同質素相當嘅大行搵三部MPV畀大家參考。
皇冠款夠新 周租$4,320
皇冠汽車提供嘅MPV租用車款唔係最多嘅一間，之不過大部份車款都可以話係最Latest款式，今日呢部Previa2.4就係07年豪華版，雙趟門方便老人家同小朋友上落車，中排兩張獨立大班椅，行到攰攰哋就大派用場。
新春租車價：1月24-31日期間，Previa以「每星期特價」價錢再九折，七日周租價約$4,320。
有得揀：Picnic、Alphard；就連Mobility類福祉車都有得揀，由$3,000起。
查詢：皇冠汽車（28801515）
大昌款多 三日$3,120
大昌提供MPV車款相信係三間之冠，平均車款較皇冠舊，但07、08年車款都有得揀，以同級車型嚟講有Odyssey、Presage同Previa，當中Previa係最Latest款式，但部部車都Keep得新淨之餘，仲趁春節期間人人放紅日，佢都放假但就繼續24小時Online支援，有咩頭暈身㷫都無有怕，絕對夠細心同體貼。之不過新春租車得三日，幾日未必夠用圍起亦貴過皇冠周租，之不過人多走多處都算方便。
新春租車價：1月24-27日及1月25-28日任擇其一，三日租車新舊MPV車款都係$3,120。日租及周租則維持原來價錢。
有得揀：Stepwagon、Serena；唔介意揸舊款，04年或之前Lafesta、Prairie、Picnic更低至$2,150。
查詢：大昌行租車易（27682277）
Avis款少類多 周租$4,320
喺外國租過車嘅，對國際大行Avis唔會陌生，香港分店提供嘅車類型絕對係行內三甲。不過唔似得自己地頭車行般提供多款MPV選擇，一隻手都數得晒，好彩係差不多都係08年車款，以載物量多嘅Stepwagon為例，2.0及2.4公升八座新款，春節唔加仲減，夠晒入鄉隨俗。MPV款雖然少過人，但量多，唔怕無車租。車行提供嘅類型多而齊，就連冷門特別版MiniCooperConvertibleSpecialEdition又或者跑版BenzS350L、PorscheCaymanS、CayenneTechArtVersion等都有。
新春租車價：1月31日之前，Stepwagon新年優惠價$4,320，係平時「周租特價」價錢九折，同皇冠一樣。
有得揀：Odyssey、Estima、Alphard，價錢由$4,320起。
查詢：Avis（28906988）
租車要與校長同齡
每間租車公司均有個別條款、收費同服務，租車前應詳閱了解，基本條件及規條有四項：
1.年齡
譚校長譚詠麟話年年都係25歲，多數租車公司最低條件都要求租客年滿25歲及擁有兩年或以上牌齡。
2.保險
租車往往要畀按金，當中已包含汽車保險，遇有甚麼意外或損毀，費用一般由租客負責。
3.汽油
車行一般會入滿汽油至交車客人，租客還車時亦要入滿油交還。
4.送/還車服務
一般車行都有送車及收車服務，因應公司定價而收取服務費。