幾多情侶可以由相識、相愛、了解、分開再變成交心的好朋友？許志安和鄭秀文（Sammi）做得到。安仔近日不停被指有意與Sammi復合，但他心目中已把她當成一個比好朋友、比知己更好的朋友，經歷多年，這位信任得過又可以分享秘密的超好友，在他心目中有着舉足輕重的地位。 撰文：李珮洳
許志安最近推出的新碟《自導自傳》邀請了好友包括蘇永康、張衞健、梁漢文和鄭秀文等講出對他的看法，相信大家最想知道Sammi怎樣講安仔。在片段中，她指安仔以往包容她很多缺點，是良師益友，也是她心中的大太陽，給她很多正能量。
分享秘密
安仔對此覺得很窩心，日前他接受訪問時說：「佢錄呢番說話我係唔知㗎，我後來睇番先知啲朋友講乜，我最有感覺係聽到Sammi叫我唔好放棄我嘅根，一定要唱落去，佢真係好了解我。」
近來安仔和Sammi在公開場合中沒有半點避忌，在記者前有說有笑，出席完張衞健的婚禮後遂傳出兩人復合的消息，安仔感到有點無奈，他說：「咁多年嚟啲報道寫咗我哋幾多次分手同復合，最近又寫我同佢復合，跟住另一個報道就寫我哋分手，真係好好笑。唔好話我老套，好朋友又真係點解會復合呢，都咁多年啦，呢類新聞真係冇停過，好彩我同Sammi睇完都唔會有乜嘢反應。」
問安仔怎樣形容現時與Sammi的關係時，他想了半分鐘，然後面帶笑容地說：「我唔係想耍你，我真係唔識點講，我同佢嘅關係唔可以用文字去形容，我哋乜都會講，大家好信任大家，佢係一個我一生一世會support嘅人。我任何嘢都好放心講畀佢聽，佢有秘密又會同我講。張衞健係我嘅知己，但我覺得Sammi又唔係，總之形容唔到，我只可以講同佢𠵱家嘅關係verygood。」
保護新歡
現時41歲的安仔當然想過成家立室做爸爸，但他仍未有衝動結婚。對於新女友Michelle，安仔不欲多談，他覺得無論與圈內或圈外人拍拖都要好好保護對方，他說：「由第一個女友開始，我都抱住同一個態度，大家影到咪影，我唔會主動講，承唔承認我唔會開口講。我41歲喇，唔拍拖真係唔正常，我𠵱家嘅感情生活會用舒服去形容，可以講嘅就係咁多。」
此外，安仔昨日接受新城訪問時提到會否跟女友同居時，他耍手擰頭說：「我好驚同居喎，冇晒私人空間同神秘感，我絕對反對，又從來冇試過，因為結婚時先會有期待同個女仔一齊生活嘛。」
戰勝抑鬱 看透人生
在歌唱事業上，許志安近幾年沒太大起色，甚至有人覺得他已陷入低潮，連他也直認不諱，他說：「人生好似行山一樣，行到山頂又要行番落山腰山腳，你唔會成世都喺最高嘅位置。」
曾經有一段時期，安仔和傳媒關係不太好，他坦言當時不想見任何人，更想過放低一筆錢給家人，然後一走了之，他說：「當時我唔開心唔係全部因為報道寫我唔好，主要係當時爸爸身體唔舒服，我喺屋企一定要畀好多正能量佢，其實我好唔開心，已經有初期嘅抑鬱症。我一入行傳媒朋友對我好好，自己好少有唔好嘅新聞，唔知點解有一排好多唔好新聞圍住我，嗰一刻我先知做咗咁多年，自己怕呢啲嘢。」
「最緊要好玩」
直至爸爸離開，安仔感到解脫，他說：「我𠵱家覺得做嘢最緊要好玩，以前我又怕痕又怕痛，再諗番媽咪生前一飲酒就會對住我唱『人生如夢，夢裏不分西東』，好多嘢都係夢一場，瞓醒就冇事，你認為有事都只因為太執着。」
曾奪過無綫《勁歌》最受歡迎男歌星的安仔，對事業仍有鬥心，但他已看淡獎項，他說：「獎對於許志安嚟講某程度係一種快感，我最希望有人覺得我對香港樂壇有貢獻。」
此外，安仔昨接受新城訪問時提及現今歌手的唱片銷量較昔日遜色，他說：「以前淨係梅艷芳出一隻碟已經夠華星一年運作，我試過一隻碟賣20幾30萬，雖然𠵱家唔同以前，但有幾多做幾多。」