商台節目主持人黃永開咪狂鬧女新聞官，激起一眾政府新聞主任同仇敵愾，有新聞主任喺facebook開群組狂插黃永，唔使一日有過百人參加，唔通黃永真係犯眾憎？廣管局則收到八宗投訴，針對黃永言辭粗鄙同語帶恐嚇，局方會跟進。八方聽聞，政府新聞處高層見群情洶湧，噚日去信商台投訴兼表達不滿，對公務員遭人身攻擊感到遺憾，希望唔會再歷史重演。
部份新聞主任稱，其實多個部門嘅新聞官都受過所謂「名嘴」閒氣，呢啲「名嘴」對位高權重者頭耷耷，面對低層公務員就扮「十點前特首」。黃永繼續死撐，反指商台好多人曾遭新聞官冷待，佢人身攻擊女新聞官，只係代同事出頭，宣洩群眾不滿啫。