本欄去年8月中開倉時，大笨象（005）嘅股價約有120元，現已跌剩一半也沒有，碎盡散戶的心；而作為〈蘋果開倉版〉嘅主理人，今次也在過農曆新年前，將最後盈利全下注，若再輸，只是在牛年從頭再玩過，安慰自己也好，小注怡情不輸也是一種技術，喺現今時勢唔易做到。但不是盡地一煲，只用例票推介「老朋友」英甲的列斯聯主場打敗彼德堡。
低潮已過主W好分頭
大笨象重挫，散戶血流成河仍不服氣，越跌更越買，如同賭錢拗氣一樣，隊波越輸越唔信邪，貨越溝越淡。大家不要忘記，400股一手，現時入場最低消費仍要兩萬幾蚊，股價由逾百元買到𠵱家，咪話唔傷；今次海嘯，個人更認清同股票講感情冇好結果，買咗長揸不放亦未必着數，5號仔一兩年後或可再做紅底股，但其實市場上大把好股嘅中線回報率一定多過一倍，何必要逆市而行呢？
言歸正傳，上周貼雷丁失手，反而前周推介也中伏嘅昆士柏流浪作客也贏；本欄近期遭愛隊輪流玩弄，每每貼早一場，今次借各級打足總盃，不如順勢再捧愛隊列斯聯在英甲聯，打敗排名比他們高的彼德堡。事實上，列斯聯早兩個月經歷低潮期，原領隊被炒加上主力受傷，現跌至第9位，小弟也避之則吉；但見球隊近期似重上正軌，上仗作客贏到白禮頓，連射球機器碧福特據報已傷癒候命，休息期比周中要踢補賽嘅彼德堡長，竟開「讓球主客和」，激氣也要捧唔好分嘅兩倍單W。
韋斯咸燕豪芬互串
另一重心注捧漸克服困境嘅韋斯咸，在英足盃早場作客打敗英甲哈特普爾；串射燕豪芬擒NAC。冷門博埋列斯聯勝[-1]，串燕豪芬贏2:0、3:0。
近5場往績：LLLWW
蘋果波神
水準有目共睹，長跟必有着數。