消防員被踢爆喺消防局BBQ屢見不鮮，一般市民可能覺得咁做唔係幾妥，不過消防員認為咁做冇大問題，消防處處長盧振雄噚日同八方講，佢哋同員方工會討論過喺局內BBQ呢個惹火問題，諮詢後認為可以保留呢個「傳統」，不過就要收緊指引，免得再生醜聞。
着制服影相要端莊
處長話新指引會規定唔可以用消防器材當做道具影相，即係用消防斧頭架頸影相呢啲行為，日後唔應該再出現；至於穿上制服拍照，仍然容許，但甫士必須端莊，動作舉止唔可以有損部門聲譽，亦必須有督導人員在場，點為之大方、端莊，處方高層話好難逐一講明，總之大家都係成年人，應該清楚邊啲嘢做得，邊啲嘢唔可以做。
盧振雄又話，已同員方表明，希望大家嚴守指引，否則再爆出所謂BBQ派對「醜聞」，處方就要好認真考慮一刀切禁止再喺局內舉行BBQ派對，至於點解唔立即禁止一了百了，處長指消防員大時大節都要當值，有消防員認為應該彈性容許親友去消防局BBQ，可以維持士氣，所以繼續保留「傳統」。