每次看到那些職業足球員門前失機，又或是離門幾碼「打飛機」把球射出門楣外時，總禁不住狠狠的駡一句：「有冇搞錯，咁都唔入！」若果有幾個球迷波友一起看的話，還會補上一句：「俾我都射得入啦！咁渣㗎！」
終於，報應來了！
上星期為了重溫踢七人賽的滋味，改變了深夜踢足球的習慣，改為早上跟公司的足球隊補課練習，當當陪練，戥戥腳。
好不容易等到人齊開波，感覺氣力充沛，大可以助攻助守。可踢七人場跟深夜踢的五人場不同，場地大得多，上上落落幾回已開始氣力不繼，氣喘如牛。接着當然是採取企鵝戰術，大多數時間站在中場附近蕩來蕩去，只在必要時才花點氣力追追滾動的皮球。
突然，對手在中場失波，我們有一個快速反擊的機會，隊友很快把球推向底線，眼看有入球機會，當然拚盡全力殺入禁區，迎接來球。說時遲那時快，隊友在底線前擺脫了追纏的後衞，傳出一個又快又勁的半腰波，我趕緊衝向龍門口，希望在其他守衞趕到前把球撞入網。幸運的，我比守衞早到一步，在離門兩碼左右撞上傳球。誰知，我踢中的是球的底部，即術語說的炒中波底，這個眼看必入的球就冲天高飛，越過門楣，幾乎飛出場外。
隊友沒有說甚麼，他們臉上那副難以置信、似笑非笑的表情讓我深深感到他們心裏在說：「有冇搞錯，咁都唔入。俾我都射得入啦！咁渣㗎！」
唉，原來離門兩碼射失唔係咁難㗎咋！都係唔好亂笑啲球員！