大笨象俾大行魔笛追魂，早排日日跌幾蚊，最低見過54蚊9毫子，證明呢個世界冇嘢係冇可能。今晚係年廿九，就等我青蛙仔喺送鼠迎牛之前，同大家一齊創造奇蹟。
澳職聯常規賽打埋呢輪就煞科，今日場昆士蘭獅吼主場對珀斯光輝，點解我咁夠膽揀「主其他」？無他嘅，獅吼近排喺主場比賽，唔知食錯乜嘢藥，場場都入成3、4球。睇番佢哋對手光輝，係就係屎啲，不過前線兩件達廸同路卡維斯亞入到波，聯賽加埋有成19球，所以要上演入球騷，真係唔係冇可能，一於推介獅吼贏「主其他」俾大家。
博飛燕諾贏3:2
至於場荷蘭波，飛燕諾前幾年對親威廉二世都贏大大鑊，好似係5:1、7:0同埋6:1咁呀，但今季佢哋超唔掂，歇冬後兩次對海倫芬都輸晒；之但係威廉二世都唔見得畀佢哋好，喺客場聯賽仲得一場冇失波。雖則飛燕諾今非昔比，但前線嘅馬卡爾同埋比錫斯禾爾算係入到波，就博佢哋贏3:2。
另外，布拉加嘅級數肯定係波圖之下，不過喺輸畀賓菲加之前，喺聯賽保持連續10場不敗，證明佢哋有啲實力；波圖冇錯係星光熠熠，但係歇冬後喺防守方面似乎有啲問題，踢5場比賽3場有失波，而且失咗成5球，所以布拉加要贏波，真係唔係冇可能；而佢哋贏3:2有成50倍，10蚊買落去中有成5嚿水，夠你聽晚去年宵市場掃貨。
文：青蛙仔