佳節快到，雖然農曆新年跟聖誕好大分別，但又自然諗起昔日中學時代寄卡、收卡的日子。人大了，少了呢支歌仔唱，但如果忽然有心，想同啲少見面的朋友聯絡感情而又唔想多使錢，其實網上有不少免費E-Card可用；既慳皮又環保，只要用得小心，一舉兩得，何樂而不為。
記者︰陸俊雄
攝影︰王文忠
Model︰Sakura
伊卡島搗鬼信封+郵票
如果就咁紅底加句黃字，寫上恭喜發財就算的話，建議唔E好過E了，免得朋友覺得無誠意。如果想多幾個款可以揀，可以試到一些台灣網站，首推一個叫「伊卡島」，內有不少搞笑的免費賀年卡，有少許Flash畫面。
佢有信封和內卡之分，封上可以自選郵票，有牛頭揀；但奇怪！見有其他生肖的內卡圖畫，卻未見有牛，有點可惜。也有點值得提的是，佢有背景音樂選擇，例如天空之城，應節的都有「鳳陽花鼓」，是擺明老套，但應該幾受落。
新絲路12生肖齊賀歲
如果記得老朋友幾時生日和屬乜生肖，不妨可到另一個叫「新絲路」的台灣網，既有賀年卡，也有齊12生肖卡。雖然玩法唔多，只是更改文字大小和顏色，以及背景顏色等，但勝在跟「伊卡島」一樣，免費且完全不用登記戶口，只要打上自己和對方的電郵就可以了，新浪網反而有少許程序，要先做會員。
Hallmark番邦加相賀年卡
老實講，外國E-card網對中國農曆新年沒有多大感情，因為可以找到好多聖誕卡、生日卡和情人節卡，而「ChineseNewYear」的卻很少，更不支援中文字。數外國E-card網，首推一定是Hallmark，但免費的農曆年卡只有3張。雖然少，但簡單得來比台灣卡靚，當作貴精不貴多吧！佢個使用程序唔算複雜，而且有寄出日期可選擇，但要記住有時差，試過即時寄給自己，遲了一天才收到。
如果你話使少少錢（幾蚊美金）都唔怕，Hallmark也有3款同農曆新年有關的賀卡可用。收得錢當然多了玩法，最基本是可以加相，只要張相不大過6MB就可以，上載後拉入預設的賀卡樣式就可以了，而且可作縮放和旋轉。還有加入小遊戲和音樂等，但當然逐樣收錢，所以留此網做Bookmark亦不錯，或者將來會有需要用來𠱁人開心。
小心！免費賀卡收會費
E-card始終是外國較盛行，所以外國網一定多；但有些網站以免費試用引你登記，並要用戶輸入信用卡號碼；雖然做法正常，但要小心過了試用期，兼收你會員費！
例如外國BlueMountain網站，如要取消戶口時，要你在一個月的試用期內提出，否則自動更新你的戶口成收費會籍。最麻煩的是要打電話取消，你是美國或加拿大人就無問題照打可也，香港難道要打長途？所以要用任何網上服務時，千萬不可以懶睇條款，睇清楚係咪真免費，因為人家若有寫明，最終承擔責任的是自己。
BlueMountain的網址︰ http://www.bluemountain.com/
