潮人話事：NON-NO男模變設計師<br>Q-pot.女界甜心

潮人話事：NON-NO男模變設計師
Q-pot.女界甜心

做傳媒呢行，心情真係會「日做夜做、特別煩躁」，所以要搵番啲正能量撐住個人。咁蹺，專用甜品造型飾物冧死人的㗎牌Q-pot.進駐香港，愛甜品的人見到都開心，而且愛甜品嘅人都應該幾樂觀，所以即時搵佢傾傾抒發心情。完成個半小時訪問後，唔知點解個人當堂鬆晒。原因？你試試用一分鐘望住佢……啲甜品飾物先啦！

記者：吳美美
攝影：譚盈傑
SpecialThanks︰AmyDunnforTranslation

來自日誌的男模

Q-pot.設計師若松忠明先生（TadaakiWakamatsu），本來是日本人氣Model，更曾獲「The10thMEN'SNON-NOModelAward」，不過21歲的他卻選擇毅然引退，更拜師學藝跟隨師傅勢馬一正先生學習設計飾品。做得Model對時裝觸覺都有番咁上下︰「穿衣之道係最緊要適合自己，我最鍾意有細節變化的服飾，如袖口位，亦鍾意具有Classic及Modern元素的衣着。不過自己就無乜Shopping，因為太忙，無論日本、香港都係，但好彩自己的Office位於青山區，所以都能夠順便Shopping，同時亦可以喺巴黎、紐約出Trip時Shopping，亦會買時裝設計師朋友的衫。」真幸運，自己朋友是時裝設計師，羨慕死人……但又點睇香港人的衣着？「可能香港天氣比較暖，所以覺得香港人的衣着會好有精神、Energy。因為日本有不同的分類，香港只不過無咁多，所以唔覺得特別保守。」但小記就十分喜愛設計師今日的打扮，尤其是條呔，原來是比利時品牌ChristophBroich出品，可以解開鈕扣，將眼鏡放入呔中的暗袋，實在是很勁的設計，設計師果然眼光銳利。

■Q-pot.主理人若松忠明先生（TadaakiWakamatsu），現年只得32歲，仲有大把發圍空間。

做設計是表達自己

講番轉頭，若松先生由當紅模特兒，毅然再出發，成為設計師學徒，究竟點解呢？「決定入行做飾物設計時係21歲。其實模特兒工作並唔係自己最終目標，只係其中一個表達自己的途徑。之後遇到師傅勢馬一正才轉行，其實呢個轉變好自然，因為自己最想係以親身設計產品來表達自己，而模特兒並不是自己最心儀的方式。」師傅勢馬一正又點鞭策自己呢？「師傅係一個好注重個性的人，一次都無鬧過我，仲成日讚我，令到我更有自信，亦都畀咗我好多自由嘅空間，令我可以自己發揮，最終可以表現自己的個性。」
Q-pot.進駐香港，成為本地女界的一大話題，因為以甜品為主題的飾物實在太可愛，但原來若松先生最初並非想走冧女路線︰「開頭係想設計給男士用，點知做咗出嚟好受女士歡迎，自己都好詫異，亦慢慢朝向女性化方向設計，之後都有計劃做番男士系列。」插嘴問句設計師Q-pot.引入香港無耐便有老翻出現，心情如何？「其實最初都嬲嬲哋，因為日本都有好多抄襲。但係諗深一層，我們總會有些是別人抄唔到的，諸如概念、質素和理念。」

■一大早就要設計師先生接受訪問，心有不忍的小記，請他吃蛋撻醫醫肚先。

賺錢為非洲掘井

扭回正題，一系列甜品飾物設計是如何被啓發？「本身自己的設計哲學都想做回自己鍾意的事物，直接有所感受。之後囡囡出世，慢慢傾向設計一些囡囡都可以享受的事物，漸漸就做了一些以甜品為題材的設計，亦好想每個人都可以開心，Sweet就係一樣可以令人開心的東西。」其實若松先生與太太的設計理念仲好偉大，睇落去就明，「其實一路都有其他單位邀請合作，但就無特別諗想同邊間合作，不過我哋目的是想利用自己與夥伴們生產出來的合作產品所賺回來的利潤，捐給慈善團體到非洲掘井，幫助當地的人，因為Q-pot.的pot字就是與水有關，現時已經進行有關計劃。」聽到小記都好感動，不過最感動係若松先生與太太即總監若菜蓮結婚10年仍恩愛如昔，今年正正是兩人結婚10周年紀念，將會用10粒鑽石去進行設計，以作紀念，真的是行動勝於一切。