前幾日有位署名「f」嘅朋友問，敏妮可唔可以講吓保險，好似壽險同醫療保險。事先申報，敏妮唔係保險從業員（當然neversaynever）。入正題，雖然敏妮多次喺呢度講，部份保險，尤其有投資成份嘅保險，其實唔係咁值，但敏妮同意，喺整個個人理財策劃中，保險不可或缺。
視乎需要及budget
要買，但買乜？點買？買幾多？幾時買？呢啲都係問題，都唔可以靠問保險經紀，呢一樣要緊記。先講壽險，保險公司打開門口做生意，為咗吸引唔同客戶，推出五花八門嘅產品。其實對於保險公司嚟講，每樣產品都係計過成本，再加一定嘅利潤嚟定價，唔會做蝕本生意。所以理論上應該唔會有邊隻保險特別抵買，邊隻唔抵買。當然理論同實際點都有啲距離，差在距離大定細。
既然理論上冇話抵同唔抵，咁買邊類壽險產品就視乎需要同budget，更重要係知自己點解要買。舉個例，如果一個啱啱出嚟做嘢嘅年輕人，得萬鬆啲蚊人工，父母已經退休。咁就要諗，如果呢位年輕人離開世界，佢父母會頓失依靠，但以佢得萬鬆啲蚊人工，要畀家用又自己使，每個月剩到嘅錢唔多。
喺呢個case相信買保險係留畀父母日後生活所需。父母已退休，按法定退休年齡65歲，人均壽命大概80幾歲計，即係要為佢哋預備廿幾年生活費。
冇一本通書個個啱用
跟住要計數，廿年生活費即係要幾多錢，呢個就係你要買嘅保額。之後當然係睇budget，買份保險嘅保額要夠兩個人廿幾年生活費，一般壽險保費應該唔平，咁可以揀定期壽險，價錢平好多。雖然定期壽險會按年加保費，但由於case主角係年輕人，加極有限。
當然唔同人有唔同需要同考慮，冇一本通書可以個個啱用。
溫敏妮
http://wanmanli.com/blogs/