民建聯同民主黨兩大政黨不約而同喺噚日舉行維園年宵檔開幕禮，但係派場完全唔同。民建聯唔單止有孫明揚同鄭汝樺兩位局長撐場，學緊書法、不過自言經常走堂嘅鄭汝樺更唔怕獻醜，即席揮毫寫咗兩張「豐衣足食」同「福」字揮春贈畀民建聯。
民主黨個檔位則冇高官到場，親疏有別又一例。雖然冇高官撐場，但民主黨攤位依然好熱鬧，首次企年宵擺檔嘅新任副主席卿姐，似乎特別受市民歡迎，唔少路過市民都同佢影相兼捐錢畀民主黨，一身紅衣成個利是封咁嘅卿姐，堪稱民主黨女財神。
煲呔赴美避年
黨鞭華叔亦特別喺開幕儀式期間，由支聯會攤位走過去民主黨支持一吓，仲寫咗張巨型墨寶揮春「普選快來，民主萬歲」，任由揮春隨住氫氣球升空，希望爭取民主嘅訊息散發至每一個角落咁話。主席仁哥話今年係牛年，民主黨都會好似隻牛咁，喺民主路上擇善固執。
過往每逢年卅晚都行年宵嘅煲呔，聽日起放假去美國度假，2月1號先返香港，據知佢今朝會去維園年宵行個大運先上機。煲呔離港，由政務司司長唐唐署理特首職務。