商台節目《在晴朗的一天出發》近日一直追問地政總署，如何處置大澳一棵有60年樹齡、但蛀蝕嚴重嘅鳳凰木，地政總署前晚回覆話已經斬咗，主持人黃永怒斥官員真正先斬後奏，噚日開咪時忽然大班上身、毓民回魂，指呢單嘢係天星碼頭翻版，點名狂鬧負責回覆佢嘅地政總署女新聞官，「無恥、冇口齒、低劣、低裝、下三流」，仲聲言過年後，要幫棵樹貼張訃文喺呢位女新聞官嘅家門口。
新聞官係傳遞消息中間人，無端變成箭靶，八方聽聞當事人甚感委屈，有人更喺辦公室以淚洗面。政府新聞處噚晚發表聲明反擊，但冇點名，表示對於有電子傳媒對個別公務員作人身攻擊，感到十分遺憾。政府新聞主任協會稍後去信商台同廣管局投訴。黃永死撐，指政府小器。