上海出名多美女，美食都多。上海人忠於自己的習俗，講上海話、食上海菜，雖然來到香港，文化有所融合，但到了農曆新年仍會保留傳統，食上海賀年菜。點解上海人新年時一定食蛋餃？等祖籍上海的靚女名模楊崢話你知！
記者：周靜雯
攝影：譚盈傑
Wardrobe：Cocktail
砂鍋大鴨不能少
提到上海傳統賀年菜，「金錢扒大鴨」一定唔少得！廚師會先將足3斤重的廣東米鴨燜3小時至腍身，再用上海紅燒煮法，將大量京葱、冬菇與米鴨一起烤煮至入味上色，鴨肉入口即溶。用新鮮廣東米鴨，因鴨胸肉夠肥夠厚，肉多而骨細，脂肪多啱用來燜煮。京葱佈滿一碟，寓意黃金常滿，夠意頭！鴨本身肉性甘平，滋陰清熱、補血養胃，特別啱冬天食。
另一道傳統菜是砂鍋湯，上海人家庭愛將蛋餃、粉絲、黃芽白、鹹肉及金華火腿放入砂鍋，以濃湯滾起，熱騰騰的上枱，全家人圍在一起食，溫馨暖笠笠。總廚更加入鮮蝦、花菇、髮菜、雞件、蝦丸、菜肉餛飩、百頁卷（用腐皮包着豬肉）及鮮冬笋，炮製成「黃金全家福砂鍋」，食得更富貴體面。每鍋都是即叫即製，要花1小時，絕非淋上熱湯便算。
必食黃金蛋餃
上海人新年一定食蛋餃，靚女楊崢（Vanessa）是上海人，她最愛幫媽媽自製蛋餃，「上海人新年食蛋餃，因為蛋餃外形似金元寶，夠好意頭，初一至初三都會食。」除了蛋餃，還會以紅豆沙當早餐，「我都唔知點解，但媽媽在早餐時會煮紅豆沙。」另外，她的外婆會炮製黃豆豬腳湯，豬腳骨膠原豐富，湯煲起不久便成啫喱狀，「湯有好多骨膠原，對皮膚好好！」
廣東人認為冬大過年，但Vanessa指上海人是沒有做冬這回事，農曆新年就會一家人食團年飯。原來她經常到「王家沙」食上海菜，當中的醉雞，她更認為是全港數一數二的好食，「這裏的醉雞用嘉美雞，不太肥，醃得很入味，肉質相當好。」不少醉雞的肉質會霉，但這裏的醉雞肉質有嚼勁，能夠做到以酒帶起雞肉的鮮味，難怪得到Vanessa的芳心。
炮製要1小時，記得要食當中的蛋餃，將「金元寶」帶給自己！散叫$398
米鴨足3斤，啖啖肉，又有暖胃效果！（跟套餐）
松子桂魚：著名上海菜，桂魚拆骨起肉再油炸，用上海酸甜醬做汁，開胃！散叫$98
黃金遍地：將泰國對蝦炸至亁身，再用鹹蛋黃炒至金黃色，連殼都想食埋！（跟套餐）
楊崢說這裏的醉雞肉質好又入味，其他地方食的都比不上，記得唔好錯過！$68
八寶飯：蒸時煙韌，煎時香口，兩種都同樣美味。$48
黑羊酥湯圓：上海傳統甜品，正宗做法是用清水，現在則用薑汁糖水。（跟套餐）
賀年套餐（1月19-31日）
迎春接福
（包括松子桂魚、黃金全家福砂鍋）
12位$1,388、6位$738
恭喜發財（包括黃金蝦、醉雞）
12位$2,688、6位$1,488
如意吉祥
（包括松子桂魚、金錢扒大鴨）
12位$1,688、6位$888
王家沙（22658488）
九龍塘又一城G-23舖
