畢：牛兄，上周你揀嘅米堡淨吞西布朗3蛋喎，點搞呀？
牛：你估我想㗎！我夠跟你曼聯英聯盃買「單」啦！
畢：都係黑仔㗎喇！場波我推介咗「單」、拿尼「首球」、波膽要3:0、4:1，結果完場前俾打比郡追至2:4。
牛：中「首球」好嘢喎！不過曼聯尾段又唔似放水吖，衰在領先緊咁多都要攻，咪搞到[-2]開唔到「主勝」囉！
畢：我覺得基里斯班尼斯補時入嘅罰球，係龍門賓科士打特登撲慢啲救唔到。
牛：哈！賭仔梗係姓賴。
畢：唔係我話㗎！係買咗單W過關嘅仙道彬提我一提，我先覺得咋。
牛：算啦畢傑！呢個禮拜有乜好嘢？
畢：除咗隔籬〈早飛2+5〉頭條嘅伯明翰，都有英足盃西布朗對般尼開「大」嘅。
牛：嘩！你個死仔越賭越偏，嗰邊英冠係蘋果波神嘅地頭，你都夠膽踩？我就玩第2場好過咯。
畢：冇話踩唔踩嘅，有心水咪推介囉，攞個心出嚟㗎我！
牛：英冠我唔玩喇，呢排澳職我手風好順，我要今日晏晝5點嗰場墨爾本勝利對威靈頓鳳凰開「大」。
畢：願聞其詳。
牛：墨爾本勝利仲有機會爭常規賽冠軍，做到盟主嘅話唔使睇季後賽成績，就攞到亞冠盃資格㗎喇。威靈頓鳳凰仲有機爭前4打季後賽，兩隊實去盡！
畢：你有你講，我有我聽，溝埋一齊嚟做條2串1吖笨！
牛：唔信我就笨喇！