上期我大大隻字推介維拉利爾「主勝」，結果順利開出，同拍檔牛兄輪住當旺，佢喺本欄手風一般，我更要揀得小心。今日係年廿八，梗係要洗邋遢，英冠伯明翰周六作客黑池，淨睇對手個名都知好污糟，既然「黑」就要清潔洗亁淨，客W2.05倍放心捧。
伯明翰最近宣佈，上個球季佢哋除稅前錄得430萬鎊盈利，比起再上一季嘅660萬鎊虧蝕，目前財政狀況穩健好多。家陣伯明翰排喺聯賽榜第3位（27戰52分），由於次席雷丁（28戰54分）上周輸畀史雲斯，少打一場嘅伯明翰只要周六擊敗黑池，就即刻可以升上呢個可直接升班位置。為咗打英超至少可袋走2,000萬鎊，佢哋實搵黑池祭旗。
伯明翰實力超晒班
講真，伯明翰今季一早放棄晒英足盃同英聯盃，兩個盃賽已提早出局；睇番英足盃第3圈對狼隊場波，佢哋就收起晒大量主力，擺明博出局寧願爭升班好過。
周六場波，伯明翰主力如菲臘斯、麥法頓、賓特、施巴斯坦拿臣同列治維等全部可以披甲，雖知上述咁多位都打過英超，實力喺英冠真係超晒班。至於剛由韋斯咸外借返嚟嘅中場保耶，都喺上場聯賽迫和卡廸夫城1:1建功，成隊波各個位置都好強。
黑池6場不勝兼缺射手
黑池近6場聯賽都未贏過，臨時領隊柏基斯領軍後都未有新衝擊。最慘係隊中首席射手、暫得6個聯賽入球嘅貝基斯因傷缺陣，就算上周從李斯特城借得前鋒杜廸利甘保加盟，不過呢位27歲球星早前就係俾前球會伯明翰放棄，今倒戈力量有限，相信客軍對佢瞭如指掌。難怪柏基斯講到明唔夠前鋒用，想即時斟兩件射手返嚟喎。
伯明翰2.05倍單W真係好抵買，只要佢哋洗亁淨個黑池，重返英超之路相信會好光明，大家齊齊重注呢場過肥年。
早飛倉
主菜：星期六16伯明翰勝（2.05）@3,000
渾水摸魚過關：星期五1墨爾本勝利大（1.54）x星期六14西布朗大（1.8）2x1@500
今日早餐價錢：$3,500
上日賺蝕：未計周二成績
早飛倉結餘：$94,274
規則：$100,000本錢，每日買早報最多動用$5,000，最少$1,000，逢周二、五見報。
早飛王貼士
星期六16 黑池vs伯明翰
首選：伯明翰勝（2.05）
次選：黑池細（1.65）
冷選：伯明翰勝2:0（8）
周末焦點
星期六37 曼聯vs熱刺
兩者周中同樣戰畢英聯盃，且雙雙殺入決賽。曼聯或出副選，主力如貝碧托夫及基斯坦奴朗拿度等料任後備；熱刺在英聯盃4強次回合戰至加時才淘汰般尼，體力輸蝕。
星期六43 祖雲達斯vs費倫天拿
祖記聯賽主場6連勝，但上季在都靈奧林匹克球場便以2:3不敵費倫，幸今有守將基謝拉停賽復出。費倫繼柏仙尼售予森多利亞後，剛剛又賣走奧斯華度到博洛尼亞。
星期日18 利物浦vs愛華頓
又是默西塞德郡打吡！兩間宿敵球會周一才於聯賽碰頭，當時愛華頓尾段迫和1:1。星期日兩者再於英足盃第4圈碰頭，絕對是焦點所在，愛華頓屆時更有中場費蘭尼停賽復出。