立法會位於添馬艦嘅新大樓已動工興建，預算2011年落成，新大樓由國際知名建築師嚴迅奇包辦設計同室內裝修。大樓採用設計與承建方式興建，議員對外貌冇話事權，不過對內部裝飾、佈局就可以指指點點，八方聽聞議員睇過嚴迅奇提交嘅內部設計圖後，一致認為唔掂，拒絕收貨。
𠵱家立法會大樓係古蹟，議事廳有四條巨型石柱，加埋個拱形圓頂，氣氛莊嚴又有氣派。新大樓個議事廳設計全面現代化，八方睇過部份設計圖，覺得佈局有澳門立法會影子，天花裝飾似足北京人民大會堂。雖則香港已經回歸中國，主席曾鈺成又係疑似中共黨員，但立法會都唔使喺個A貨人民大會堂開會啩！
據稱各黨派議員睇過設計圖後，對呢種疑似人大裝飾方法好有意見，罕有地幾乎一致反對，曾鈺成亦坦言「冇乜驚喜」。因此立法會邀請嚴迅奇同設計團隊，3月親自向議員解釋設計意念，議員亦會講吓想點樣設計同裝飾，始終議員係大樓用家，冇理由冇say。
設計可由人民公投
議員心目中新大樓應該點樣裝修呢？可以話百花齊放，據講有人建議多用花崗岩、雲石，即係類似現時立法會大樓用料，覺得咁先至夠派頭、莊嚴；亦有人話可以考慮多用深顏色嘅木材做裝飾，以凸顯立法會嘅歷史氣氛。為咗令嚴迅奇多啲了解議員口味，八方聽聞有關方面借咗十幾本設計書畀嚴迅奇參考，希望佢參詳後更改現時設計，提交新圖則，否則隨時俾人鬧足50年、100年，因為立法會大樓應該有幾十年壽命，俾人讚好過俾人批評，相信設計師都唔想留下污名。
設計係好主觀嘅工作，好壞美醜冇乜客觀準則，議員對大師設計諸多意見，插手干預唔知算唔算妨礙創作自由，而且幾十個議員，可能有幾十種意見，如何定奪𢱑爆頭；㩒掣投票人多者勝，即係畀民建聯話事啫；坐低慢慢傾，分分鐘議而不決、決而不行。議員一齊開聲批評好容易，達成共識採用邊種設計，相信十分艱難。
既然立法會新大樓係公帑興建，何不全民公投室內設計？真正人民議會應該畀市民發聲，只怕阿爺一聽到公投就驚，一錘定音人大話事，如何裝修北京揸主意，好似釋法咁，香港人得個睇字。
mailto:[email protected]