擸架生啦！「做乜？」洗車呀！年廿八，有乜好搞？仲唔係例牌洗邋遢，拎部愛車出嚟洗洗佢啦。據八卦人士講，「洗邋遢」講意頭，點都要自己動吓手！等陣，咪行住，聽聽師傅指點先啦。亂咁嚟，隨時越洗越污糟、車身花埋都事小，唔「老利」至大件事。
記者：黎頌詩
攝影：楊錦文
Model：Ceci
鳴謝：NTI快速汽油護理（產品查詢：23452193）
外：洗靚部車話咁易！
今日，由專業洗車公司NTI嘅負責人Pat姐教路兼督住你洗車。佢話洗車可以多多法寶大陣仗，不過只要記住竅門，即使自己動手，簡簡單單已經可以令部車令立立。
準備架生
a.抹布
b.洗車液
c.胎軨洗劑
d.輪胎護理劑
Step01
照頭淋
同部車洗白白，最重要嘅第一步係大桶水照頭淋。呢個步驟好重要，唔先徹底將泥塵冲走，到用抹布或海綿拭抹時，殘餘嘅沙塵就會將車身弄花。當中又以用水喉射水最好。
Step02
1比20
用水混和洗車液，份量比例約係20:1。Pat姐指，洗車液一定要選擇中性的，因為鹼性嘅清潔劑會傷害汽車塗層。呢個時候可以用海綿同抹布清洗全車。特別要留意鬼面罩同氣壩呢類難洗部份，要落多啲心機細心抹。最後就拉起水撥用布清潔，呢度係頑固污迹積聚嘅地方。
Step03
洗胎
洗完車身，要針對走過千山萬水嘅四條輪胎喇。唔使問佢哋梗係一身污糟黐到實，首先，胎軨要用專用清潔液對付，直接噴上去就可以令一般嘅污迹脫落，仲唔掂，用布抹多抹。好喇，係時候再冲身啦，冲淨車身上嘅洗劑就搞掂！
Step04
上蠟
最後，係扮靚時間。車身可上一層水劑車蠟，一噴一抹好簡單，要打得又靚又勻，就記得要用打圈嘅手勢。輪胎就要用輪胎專用嘅護理劑，將護理劑噴上海綿，再抹上輪胎，靚晒！
好介紹
洗車身基本套裝，包括胎軨、車身洗劑及纖維抹布。$128
內：記得捐窿捐罅
準備架生
a.絲絨清潔劑
b.抹布
c.軟毛刷
d.毛掃
Step01
針對鬼祟位
內櫳嘅泥塵要用吸塵機對付，竅門係捐窿捐罅，特別針對鬼祟位，如分佈全車嘅各種貯物位；仲有，椅背同坐墊嘅接合處係最藏污納垢嘅地方，要盡量將吸嘴插入深處。而冷氣出風口及中控台按鈕密集嘅地方，用毛掃嚟清潔就最有效。
Step02
中控台
除完塵，就到抹布出動。其實用清水都已經足夠，記住，抹中控台時布唔可以太濕，小心入水。最易忽略係天花，抹嘅時候唔好太大力呀！
Step03
座椅
皮椅最好只用水抹，若用洗皮水也切勿直接噴射，先噴於抹布再抹較穩當。絲絨則可用清潔劑再加軟毛刷，若不清楚清潔劑性質，先噴抹布啦。
Step04
地毯
地毯就最易搞，軟毛刷對付，唔會身嬌肉貴嘅佢，噴清潔劑又擦又水冲都頂得住，洗淨曬亁又靚晒。
錫晒Yaris
洗得咁細心，因為佢好抵錫㗎，咪就係我部愛車、五門揭背嘅Yaris囉。睇樣，佢細細部，圓碌碌，夠晒可愛之餘又充滿運動感，同我就最襯。我個人最怕侷促，不過Yaris雖然係小車，但內櫳就出名寬敞，前後排都咁有空間感。揸上手就更加討人歡心，中控台超簡潔，易明嘛！錶板別出心裁地喺中控上方，夠獨特。最重要係佢1.3公升引擎勁慳油，我多朋友，又不時Shopping，用到佢盡都唔肉痛。
規格
引擎：1,298c.c.直四VVT-i
馬力：87ps/5,600rpm
扭力：12.3kgm/4,400rpm
傳動：四前速自動波
售價：$145,260
查詢：28661020（皇冠汽車）
