花旗集團管理層又執位，噚日宣佈更換公司舵手，時代華納前主席帕森斯（RichardParsons）將接替比肖夫（WinfriedBischoff）做主席，係繼美國前財長魯賓決定唔撈後，最新嘅高層變動。
時代華納前主席坐鎮
咁又難怪，花旗係次按大輸家，舊年勁蝕187億美金（1459億港銀），唔單止要華府出手拯救，仲要將業務一拆二搞精簡，連魯賓都要黯然下台，辭咗集團高級顧問職務。作為揸弗人之一嘅比肖夫，又點會唔使孭鑊呢？
花旗今次識得搵帕森斯做主席，可為搵啱人，事關佢老哥最叻係幫公司慳錢。佢02年接掌虧損嚴重嘅時代華納，即時手起刀落搞瘦身，三幾年間就幫公司轉虧為盈。
今次花旗吼中帕森斯，想點唔使畫公仔畫出腸啦，相信嚟緊花旗將會有更多重組計劃，至於裁員嘞喎，睇怕都陸續有嚟。