前晚啲歐洲盃賽吹冷風，幾支被睇好嘅球隊好似係烏甸尼斯、熱刺、NAC同巴塞隆拿都贏唔到，其中熱刺更加衰到喺英聯盃4強次回合吞咗英冠球隊般尼3隻光蛋。但你咪理，佢哋係「行運超人」，雖則加時之後都仲係輸2:3，不過英聯盃啲騎呢條例，就幫佢哋打入決賽同曼聯爭冠軍。
門將艾恩域屎爆
熱刺受傷兵問題困擾，領隊哈利列納喺前晚場次回合排唔到強陣，但正選名單都有活基治、莫廸歷同廸科爾等壓陣，加埋首回合領先4:1，相信冇乜人估到佢哋會輸番0:3。講真，我求大俠以為熱刺個正選龍門靴里奴高美斯屎波啫，原來個後備龍門艾恩域仲屎。熱刺輸第一球就因為佢企錯位，而俾羅比比歷克射入罰球，而第3球輸得仲核突，出迎接波甩手搞到俾積洛廸古斯射入空門。結果兩回合打成4:4，但基於要玩埋加時先有作客入球優惠，咁樣般尼就出事啦。
去到118分鐘般尼仲係贏緊3:0，捱多兩分鐘就可憑作客入球優惠入決賽（因為般尼喺首回合有一個作客入球在手），點知熱刺之後嚟料，憑盃賽射手柏夫里約真高同埋回巢前鋒廸科爾各入一球，最終雖則都係輸2:3，但係兩回合合計贏6:4，嚟緊喺3月1號可以以衞冕身份，喺溫布萊同曼聯爭冠軍。
騎呢賽制玩謝般尼
查實熱刺真係一世夠運，好多盃賽嘅作客入球優惠都係計法定時間，係得英聯盃咁騎呢，換轉係意大利盃，入決賽嘅應該係般尼至真。話時話，雖則熱刺入咗決賽，但要贏到先可以參加下季歐協盃。
為咗幫球迷對抗金融海嘯而喺未來兩季凍結門票售價嘅熱刺，打完呢場之後，嚟緊喺年廿九（禮拜六）就要打英足盃，又係對住曼聯，而哈利列納就事先張揚，大年初二（下個禮拜二）對史篤城場英超護級大戰非常重要，所以大有可能喺英足盃出弱陣。講真，曼聯一樣水浸眼眉，喺禮拜二場英聯盃傷咗3件，十字軍名單水蛇春咁長，而且下周中亦要打英超，都唔慌強陣，所以呢場波有可能變成褪色大戰。