年近歲晚，財雄勢大嘅工聯會派人落區向商戶派揮春拜早年，點知俾街坊誤會佢哋收陀地。工聯會議員黃國健噚日喺立法會保安事務委員會會議上，自爆被當係黑社會瘀事，佢話商戶見佢哋派揮春，竟然反問佢：「你哋收開幾多錢？」
原來街坊以為佢上門勒索，官員議員聽到都笑爆嘴，主持會議嘅民建聯劉江華都忍唔住恥笑黃國健知名度低，「乜佢唔知你係工聯會嘅咩？」中共高官話黑社會都有愛國，同一邏輯，愛國人士個樣似黑社會又有幾奇？
多得煲呔「狗噏」人氣升
其實黃國健近日人氣已經高咗，受惠於煲呔疑似狗噏事件，好多人睇YouTube條片，由於當時煲呔係向黃國健講疑似狗噏，因此唔少網民認得黃國健，佢話日前去茶餐廳，有個麻甩仔主動打招呼，忽然成為公眾人物，唔係幾慣。
此外，民主黨何俊仁亦有投訴，事緣佢派揮春畀街坊，用大聲公嗌咪，點知唔夠三分鐘就有警察到場，指有人投訴噪音擾民，仁哥質疑警方辦案效率，濕碎嘢就即時清場，反而集團式騙案就多年未能破案。