立法會調查雷曼小組原訂逢周五開會，不過主席何鍾泰想提早收爐，話年廿八唔適宜開會，所以改喺噚日開會。有議員同八方講，忽然改會期令佢哋失預算，原訂工作要押後，呢個主席真係好帶挈。
雷曼小組已開多次會議，下月傳召官員聆訊先係戲肉，不過閉門會議嘅幕後花絮都幾精采，據講大部份議員對何鍾泰主持會議效率有微言，估唔到佢秉承以前泛聯盟呂明華傳統，原本15分鐘可以討論完嘅話題，往往傾足45分鐘都未完事，民主派擺明想反佢枱，保皇黨卻敢怒不敢言，事關當日佢哋捧何鍾泰做主席，𠵱家自食其果，真正有苦自己知。八方聽聞會計界陳茂波最勞氣，直斥咁樣開會「嘥我時間！」