經濟陷入困境，公司裁員、減薪及倒閉之聲不絕，採用佣金制嘅地產代理，形勢嚴峻，早已有大批地產經紀加入失業大軍。
不過，咁艱難嘅環境，以特許經營方式運作嘅世紀21奇豐，竟然仲喺逆市派花紅，總共派成80萬銀，認真恨死隔籬。
世紀21奇豐董事總經理李峻銘話，要喺困難嘅逆境站穩腳，首要係穩定軍心，提升同事心理質素，學習面對同適應環境，扭轉局勢咁話。
佢仲話，舊年全靠同事上下同心，先達到08年所定目標，趁前晚舉行慶功宴，大派80萬花紅，獲派發最多花紅同事係助理區域經理周淑萍，獲發成十一萬八千蚊花紅，成間公司超過一半同事獲派花紅，實行喜氣洋洋迎牛年。