上星期獲英國首相白高敦邀請，出任英國貿易促進和投資部長嘅渣打銀行大班戴維思（MervynDavies），噚日終於同煲呔講分手，退出特區政府嘅經濟機遇委員會，做咗唔夠三個月，開咗兩次會就起身鬆人。
煲呔噚晚發聲明，表示感謝戴維思出任經機會成員期間，就香港如何應對金融海嘯提供咗唔少寶貴意見，但份聲明就冇提到會唔會有人接替戴維思。好多人指經機會係吹水會，成員多個唔多，少個都冇所謂，八方相信煲呔都冇乜特別需要搵人補位。戴維思縱橫香港銀行界多年，新職位係義工冇薪水，但難得獲英國政府賞識，當然義不容辭放棄渣打份千萬年薪厚祿，何況𠵱家做銀行大班風光不再，有好位梗係早走早着啦。