曼城球星羅賓奴手腳認真快，周一晚喺西班牙特內里費飛的去機場，周二已經喺巴西同家人攬頭攬頸，不愧係超級走佬王。之不過，佢走得一時唔走得一世，要逃離曼城真係難過登天！
曼城罰羅賓奴358萬
羅賓奴返到祖家喺個人網站發聲明，重申自己好鍾意曼城，下場聯賽對紐卡素前肯定歸隊，自己返巴西係處理家庭事務（阿仔嘅護照問題），又發誓話今次走佬同卡卡冇關。曼城行政總裁曲克喺米蘭返嚟一肚氣，講明要罰佢32萬鎊（約358萬港元）：「冇人大得過球隊，一定要揸正嚟做！」
我求大俠都唔幫「大話精」羅賓奴，其實佢係想返去慶祝周日25歲嘅生日！周一去西班牙集訓前，領隊曉士唔批假，羅賓奴「磨」到夜晚終於發難坐的士去機場，之前佢買定機票，呢個走佬計劃認真周詳！之後佢講大話表示得到曉士同意，過咗海就賣口乖「我愛曼城」，同卡卡一樣當曼城係老襯，曲克唔嬲就假啦！
羅賓奴搞咁多嘢無非想逃離曼城。不過潛在買家車仔好手緊，領隊史高拉利得1,500萬鎊（約1.7億港元）轉會資金；最關鍵係佢今季效力過皇馬同曼城，國際足協規定球員一季唔可以打多過3隊，除非佢出絕招：以同曉士嘅體育理念不合為由先走得；不過，呢招一出個朵就臭晒，好難有球隊收留佢。
做人態度極飄忽
其實羅賓奴係有鋪走佬癮，包括05年失蹤14日，缺席山度士兩場比賽；之後喺皇馬就試過爬窗從秘道逃離訓練營，避開正門嘅傳媒。08年夏天，佢就玩失蹤唔出席球會記招，自己卻開記者會數臭皇馬。羅賓奴呢種飄忽嘅做人態度，去到邊都係球會災難，未來買家要三思而後行呀！
所以呢，我求大俠奉勸羅賓奴乖乖番去自首，記得帶多幾包可可豆做手信，改善同高層嘅關係。其實，佢今季只要助曼城攞到好成績，巴西同鄉下季自然肯加盟，所以咪再嘥心機度走佬計劃，都係踢好波實際啲！