滙控（005）連跌八日，收市後競價時段逾八千人的買盤都頂唔住，以55元低收，有心買貨者可謂求仁得仁。其他銀行股亦大部份急跌，似乎信貸危機第二波開始殺埋身。
不過，股票有升有跌，從來不會一面倒，淡友多日得勢之後，港股嚴重超賣，不排除出現挾淡倉，如果真係好友反攻引發挾淡倉，算係鼠年完結前的一次臨別「抽」波。
短炒睇3元
如果博短線反彈，可揀逆市上升股份炒一轉。東風集團（489）昨跌至2.51元後，在逆風中力爭上游，股價倒升3.4%收市，報2.74元，兼且成交大增至4500萬股，短線有機會挑戰本月初高位3元水平，伺機買入，跌穿2.5元止蝕。
東風昨日逆市上升，可能與集團公佈銷售不俗有關。內地傳媒報道，東風母公司去年銷售汽車132萬輛，同比增長16.12%，係行業平均增速的2.4倍，同時係前十名銷量排名企業中增幅第一名。
方星俠