經歷鼠年金融海嘯，搞到一眾散戶失晒方向，唔知信四叔好定信分析員好。里昂見散戶咁迷茫，噚日就推出停咗三年嘅里昂風水指數，畀投資者多一個參考，仲貼咗一啲名人牛年表現，搞吓新意思，準唔準就要出年至知。
里昂話，牛年最當旺生肖係「猴」，咁啱特首曾蔭權都屬「猴」，對大家都有利。仲估煲呔嘅寵物（用咗成30萬港銀喺新居建池嘅錦鯉）牛年會發揮作用，因為池水有助隔開經濟衰退帶來嘅不祥徵兆。
超人犯太歲有女貴人扶助
但係屬「龍」嘅，牛年就唔多好，因為牛年犯太歲，好彩有「女貴人」相助。例如政務司司長唐英年就有個賢內助，不過華華就好想知同屬「龍」嘅香港首富、長和系主席李嘉誠，身邊真正「女貴人」究竟係邊個嘞。
唔單止超人犯太歲，連屬「牛」嘅新任美國總統奧巴馬，同埋屬「馬」嘅國家主席胡錦濤、總理溫家寶都犯太歲。奧巴馬本命年犯太歲，預示紛擾不斷，要為全球經濟止血，恐怕難以得心應手。至於國家領導人，牛年要面對普羅大眾挑戰，因為經濟衰退將令國內部份行業重組，好多人失業。但係里昂報告話，喜事可以驅邪，今年10月係國慶60周年，中國應可以逢凶化吉。
屬「虎」嘅葉劉淑儀，里昂估佢牛年會被八卦雜誌登佢新男友嘅相喎，仲話呢個男人一定會好強勢。華華仲留意到，里昂份新聞稿入面，屬「虎」仲有新地（016）非執董郭炳湘，唔知有冇啓示。
祖國牛年60大壽可驅邪
至於屬「猴」嘅女藝人鍾欣桐「阿嬌」，沉靜咗一年，事業有望喺4月重上軌道，仲會有具影響力人士提攜，為年中復出鋪路，牛年收入仲好豐富添，但就容易陷入複雜男女關係咁話。
今次風水指數由里昂女將陳麗妍負責，佢話自己細細個就受阿媽影響鍾意風水，舊年都有寫風水指數，但就冇公開，只係送畀客戶，唔單止香港客有興趣，遠至日本、瑞士都有客戶問佢攞喎。
李華華
mailto:[email protected]
里昂評十二生肖
運勢：當旺 生肖：虎
名人：台灣總統馬英九、港交所主席夏佳理、鴻海董事長郭台銘、新地非執董郭炳湘
運勢：當旺 生肖：蛇
名人：新地主席鄺肖卿、中信泰富主席榮智健、工行董事長姜建清
運勢：當旺 生肖：猴
名人：特首曾蔭權
運勢：當旺 生肖：雞
名人：賭王何鴻燊、利豐主席馮國經、聯通主席常小兵
運勢：平穩 生肖：鼠
名人：滙控主席葛霖、中移動董事長王建宙
運勢：平穩 生肖：兔
名人：恒地主席李兆基、中海油董事長傅成玉、東亞主席李國寶
運勢：平穩 生肖：豬
名人：人行行長周小川、金管局總裁任志剛、合和主席胡應湘、美國國務卿希拉莉
運勢：犯太歲 生肖：牛
名人：美國總統奧巴馬、恒隆主席陳啓宗、新世界主席鄭裕彤
運勢：犯太歲 生肖：羊
名人：電視廣播主席邵逸夫、蘋果行政總裁喬布斯、微軟創辦人蓋茨
運勢：犯太歲 生肖：狗
名人：九倉主席吳光正、中國銀行董事長肖鋼
運勢：犯太歲 生肖：龍
名人：長和系主席李嘉誠、信和主席黃志祥、政務司司長唐英年
運勢：犯太歲 生肖：馬
名人：國家主席胡錦濤、國務院總理溫家寶、股神畢菲特、歐洲央行行長特里謝