好多車迷都鍾意掛吓小飾物喺車度，尤其係平安符同所謂擋煞嘅小物。據馬啓福風水師傅指出，牛年犯太歲者，更應掛吊飾以擋煞護身，尤其係屬羊人士，刑冲太歲最嚴重，紅噹噹顏色至旺羊，掛埋恰當吊飾更可以辟邪護身咁話，今年羊仔仲唔「紅」足一年！
記者：梁美甜
攝影：陳陶鈞、陳盛臣
模特兒：Ceci
鳴謝：馬啓福風水師傅（23203275）
牛羊狗龍馬 犯太歲
馬師傅指09年係下元八運己丑年，流年飛星九紫入中，生肖屬牛；凡肖牛者命犯刑剋、肖羊者犯相冲、肖狗者犯相刑、肖龍者犯相破、肖馬者犯相害，簡單而言即係呢幾個生肖全都犯太歲，而羊仔就更甚，是為牛年黑仔王，最當旺就係老虎仔嘞！
根據馬師傅所言，只要運程唔係太運滯的話，大路掛飾好似心經鐘、平安符都可以辟邪保平安。計我話市面上亦有好多時款啲嘅日式開運或平安飾都大同小異，總之就悉隨尊便。下列排列係根據師傅所言，以牛年最黑仔嘅羊仔為首而逐一指點，最無大礙自然係生肖中運程最旺嘅老虎仔喇！
羊
正冲太歲，有水險及血光之災，可掛五帝錢掛飾以增運護身，又或者以紅色、粉紅色豬仔或兔仔式樣吊飾亦可。
虎
吉星高照又有貴人，全年平穩無阻滯，一般掛飾都得；亦可掛五帝錢以增運辟牛年負面桃花又或者灰白藍綠色嘅豬仔。
牛
本命年易招小人，與鼠相合可以用紅、紫等色牛、鼠掛飾。
豬
運程差，對宮羊、兔都犯太歲，加上本宮驛馬，辛苦唔得財，宜掛金虎或金色虎飾，就算Q版跳跳虎亦得。
蛇
受對宮太歲影響，運程反覆，易惹官非及口舌，宜以綠、紅色雞款掛飾，又或化小人、化是非兼吸財嘅白象飾。
雞
受本命太歲影響，運程反覆，白虎星易招血光之災，揸車要小心，可掛金色龍飾。
猴
受藝神影響容易心緒不寧精神唔集中，但多得吉星貴人特多，可掛血珀（琥珀一種）或黑蜜蠟，可強心、寧神；亦可掛龍、鼠、蛇飾。
兔
全無吉星又多驛馬星，頻撲無收穫兼易破財，可掛增財運西藏三眼天珠又或者兔、豬、狗三合吊飾。
馬
08年最差生肖今年反彈，桃花旺，對宮有劫殺，已婚者有桃花劫，可放龍紋天珠，或狗馬虎三合掛飾。
鼠
先逆後順一年，忌掛任何馬形飾物，宜掛福鼠吊金錢，招財又招福，亦能擋煞。
狗
運程尚可，有死桃花及易招是非，可以粉紅色兔飾化解，又或紅色馬、虎、狗三合。
龍
運程僅次於虎，貴人特多特旺，但要注意健康，可用火屬性顏色嘅雞或鼠掛飾，甚至一般掛飾亦得。
生肖五行宜忌
常聽人講，甚麼木生火、火生土、土生金；又或者木剋土、土剋水、水剋金等等風水命理入面所謂五行相生相剋學說，從中取得平衡、協調，一切運作自然平順有序，所以認識生肖五行屬性就更易理解師傅趨吉避凶化解之法。
五行配避凶
生肖有屬性，分為金、木、水、火、土；風水學入面生肖五行相生相剋原理配有唔同顏色，留意一下，運用得宜就可以逢凶化吉。
屬金者：猴、雞；宜金黃米、忌灰白藍
屬木者：虎、兔；宜灰白藍綠、忌紅紫
屬水者：鼠、豬；宜黑白灰藍、忌黃啡米
屬火者：蛇、馬；宜紅綠、忌灰白藍
屬土者：牛、羊、龍、狗；宜紅紫黃、忌綠