掙扎咗好耐，敏妮終於喺跌穿60蚊之後，鼓起無限勇氣，提筆寫滙控（005）。睇呢個欄嘅朋友都知，敏妮曾經兩度作出月供滙控嘅決定，第一次係越供越升，第二次係越供越跌。
同敏妮相熟嘅朋友開始揶揄敏妮，「喂，係時候交代吓！」呢句說話喺滙控跌穿70蚊時敏妮聽到嘅。相信有兩樣嘢係朋友想敏妮交代嘅，第一，敏妮認為滙控仲會唔會跌？第二，敏妮仲會唔會繼續供滙控？答案：第一，唔知；第二，會。
恐紅底股光輝不再
先解釋第二題嘅答案，除非唔信平均成本法，否則冇理由貴嗰時供，到家陣平嘅時候停供。不過，呢個會衍生另一個問題──家陣滙控算唔算平？答呢個問題即係答第一個問題。就係滙控會唔會再跌，如果唔再跌，咁家陣即係平囉，如果仲跌，即係未算平。至於第一題個答案，敏妮已經答咗──唔知！
敏妮都係凡人，同「神」有分別嘅係「神」可以一切盡在掌握之內，但塵世間嘅「神」，即使往績最好嗰幾位，似乎都對未來唔係咁掌握，佢哋頂多只係較有把握。凡人另外有一個同「神」嘅分別係，凡人有凡心，會識驚。
你估滙控由紅底股，跌到落3個麥記早晨全餐都可以買到1股嘅時候，敏妮邊食早餐邊唔驚咩。你估睇到大摩話滙控跌到52蚊，再加高盛話49蚊先係底價，敏妮唔怕咩。
靜待3月2日派成績
當日敏妮已經同公司auntie講，會唔會過多兩日有人傳滙控破產？點知開口中，外國傳媒報道，英國長毛EricKnight呼籲滙控將旗下滙豐融資清盤破產。
滙豐係香港人嘅銀行，滙控係香港人嘅股票，敏妮仍然相信佢唔會變咗香港人嘅集體「慘痛」回憶──電盈（008）。3月2日滙控業績，將會係敏妮手心冒汗嘅一日。
溫敏妮
http://wanmanli.com/blogs/