雞年（05年）後一度成為絕唱嘅里昂風水指數，隔咗3年又同大家見面，今日舉行記者會。據里昂嘅邀請函顯示，佢哋會講今年邊幾個月份最適宜投資、邊幾個行業會當旺、邊幾個生肖會有一個好嘅牛年喎。
里昂公關姐姐話，雖然佢哋個名叫做風水指數，但展望嘅焦點唔會放喺術數上，份報告係由旗下證券分析員做嘅。咁又係，以前有份搞里昂風水指數、個人對風水頗有研究嘅劉紹文，經已過檔去咗瑞信，試問又可以搵邊個嚟做呢？
舊將隔日打對台
講開劉紹文，明日亦會同瑞信同事一齊講牛年投資前景，特別係講中國同香港。聽講話，基於證券行本身嘅政策，呢個牛年展望亦唔會將焦點放喺風水術數上，會着重基本分析喎。若果真係咁，華華就有啲失望，起碼唔準都有得講吓嘛！