多謝讀者關心。近期唔係唔講大市，而係市勢大方向已定，短期嘅上上落落，受人為操控，好難捉摸，個別股票，特別係冇大戶沾手嘅股票，「單純」好多。
上禮拜一（12日）曾講過大市，當時話未來一段長時間，恒指會在10676至15781之間上落，升穿或跌破，先有新的方向，短期策略係高沽低買，繼續炒股唔炒市。
究竟要等到何月何日大市先會見底？上落市短則兩三個月，長就一年半載，通常強勢股亦出現最後一跌，就係大戶部署補貨之時，等佢哋平晒淡倉，大市就會見底，再造番好，大市就會再升過。股市升升跌跌，循環不息。
大市雖跌380點（期指更跌近500點），但上升正股仍有成200隻，而屹立不倒的亦有380多隻，繼續炒股唔炒市。早日推介的興達國際（1899），急升後已消化兩日，成交更大縮到只得149萬股，調整隨時完成，一升破0.93元阻力，短期量度上升目標係1.2元，可在破位時追入。
海外市場高速增長
中國龍工（3339）昨天逆市而上，最高3.78元，收3.65元，升4仙，成交300多萬股。去年12月初推介時股價3.29元，兩個禮拜內升到4.71元，升幅逾40%，其後調整低見3.35元，近日再回升，表現比大市為強，可再收集，博重上4.7元高位。
集團主要生產基建機械、輪式裝載機及農業機械，係內地3大輪式裝載機製造商之一，市場份額超過20%，係中央扶農政策的受惠者，加上主要原料的鋼鐵價格已大幅回落，而海外市場亦有高速發展，前景甚佳。
08年（12月年結）中期營業額39.9億元人民幣（下同），升40.9%，獲利6.04億元，升113.6%，每股盈利0.56元，中期息派13港仙。08年全年，不計衍生工具公平值及可換股債券帶來的收益，實際盈利估計有8億元，每股盈利0.73元（約0.83港元），09年可上升到1.0港元，現價預測PE只係3.7倍。
龍工海外市場分銷網絡已覆蓋47個國家，毛利率比內地高，預計到2010年的收益佔總營業額比率可由現時的7%上升到20%，提供盈利增長來源。
郭兆誠