維園年宵噚日開幕，支聯會、公民黨、社民連同匯賢智庫都即日開張大吉。論聲勢葉劉似乎領先一籌，事關佢搵嚟立法會主席曾鈺成撐場，葉劉亦都冇欺場，攤檔啲貨品全部由佢親自帶隊北上選購，收入全數撥捐香港單親協會。
支聯會召集20歲學生
曾鈺成捧完葉劉場，聽日會幫兄弟，去民建聯攤位寫揮春。社民連今年主力賣蕉形精品，曾鈺成話希望佢哋銷情好，最好沽清一件不留，日後議會就冇咁多蕉掟。支聯會主席司徒華自90年起風雨不改喺維園為市民寫揮春，華叔噚日寫足半日，但一啲倦容都冇。
華叔話支聯會舊年有46萬元赤字，預計今年籌款不樂觀，財政情況可能更嚴峻，難怪要請埋政治漫畫家尊子同馬龍一齊到場，幫支聯會籌款。今年六四20周年，支聯會將到各大專院校，召集20歲嘅大專生出席悼念六四活動，又會邀請佢哋撰寫宣言，象徵支聯會信念薪火相傳。公民黨黨魁關信基、余若薇等噚日亦出動去維園為年宵攤位揭幕，主力都係余大狀寫揮春，佢學習書法幾年，今年功力又勝去年。