星展銀行經濟研究部高級經濟師Chris梁兆基，因為日本同廣州之旅，從此立志要讀經濟。
話說80年代初，梁世伯帶住讀緊中一嘅Chris去日本旅行，見到成條街一個乞兒都冇，去麥當當一落柯打食物即刻送到手，佢心諗，乜日本唔係俾兩粒原子彈炸過㗎咩？點解成個國家仲可以咁繁榮富庶嘅？
轉過頭，梁世伯帶Chris去經濟尚未起飛嘅廣州，佢眼見成條街都係年紀比自己細嘅乞兒，對Chris衝擊好大。
Chris忍唔住問，點解兩個國家分別咁大？世伯答：經濟搞得唔好就係咁囉！
從此Chris立志讀好經濟，希望日後搞好祖國經濟，就連碩士論文題目都係研究中國經濟，𠵱家做高級經濟師都係研究中國經濟。
環球金融海嘯令到美國一哥經濟地位岌岌可危，中國經濟就近乎每年雙位數增長步步進迫，睇嚟Chris真係冇揀錯科。