年底舉行嘅東亞運動會開支預算接近2.4億元，經濟逆轉，政府籌募經費情況唔多理想，家陣仲差4,300幾萬先夠數，一旦籌唔夠，就要由大家，即係庫房包底。民政事務局德成局長對盤數心中有數，叫大家唔使太擔心，相信最終一定唔使蝕大本。
當局搵「左麟右李」演唱會為東亞運籌款，德成局長噚日透露，已力邀左麟右李添食兩場，佢大讚兩人幫得手，又話自己一定會買飛捧場，至於會唔會大量購票請朋友去睇，佢就笑而不答。西九文娛區係曾德成工作範圍，外界認為兼任西九財務小組主席嘅佢係外行人，曾德成卻話由佢呢種唔識財務嘅人管數最好，因為唔識玩財技，包保唔會亂投資蝕錢。