美國總統change人，香港政壇都有人事變化，煲呔未到年廿八就洗邋遢，噚日宣佈改組行政會議，一次過清洗多個老董年代入局嘅人離開。而盛傳同煲呔不咬弦嘅肥龍許仕仁，亦終於同「好兄弟」分手，噚日行出政府總部時，被問到有冇唔捨得，笑容好燦爛咁話「冇喎！」
失加籍失行會席
唔係個個都睇得咁開，之前吹風吹到似層層，有望晉身行會嘅海洋公園主席盛智文噚日榜上無名，政壇對此並不意外，有人指因為盛智文係鬼佬，過唔到阿爺嗰關而被拒諸門外；亦有人指盛智文食詐糊，純屬佢一廂情願，煲呔鼓勵佢多啲服務香港，唔代表搵佢入行會，可能有人會錯意，以為鴻鵠將至，仲火速放棄加拿大國籍攞回鄉卡，點知行會入唔成，連個passport都冇埋，淪為雙失中年，真冇陰功。
海洋公園噚日開記者會介紹農曆年節目，盛智文平時最鍾意喺呢啲場合扮鬼扮馬，噚日卻扮隱形冇蒲頭，唔係因為入唔到行會冇面見人玩潛水啩？冇得做行會成員啫，阿爺送番幾條國寶娃娃魚過佢養，當係補償埋個加籍，都應該抵啦。
林健鋒同病相憐
盛智文雖則係雙失，但八方勸佢唔需要自尋短見跳吊車，因為有人同病相憐。立法會議員林健鋒，喺舊年立法會選舉後，與另外兩個議員梁君彥、梁劉柔芬一齊退出自由黨，政界陰謀論指佢打殘自由黨，煲呔自然識做論功行賞畀佢入行會，可惜佢都冇份躋身權力核心，呢個權力慾白日夢終於破碎，冇得做行會成員，退黨後變成散兵游勇，計完條數是得是失，八方相信佢自己心知肚明。
自由黨喺行會一席不保，前主席田少話冇所謂，因為如果政府要箍票，自然會搵三個自由黨議員，而且佢哋一直唔想只係做舉手機器，要求政府醞釀政策時都要聽政黨意見，如果煲呔做唔到，其實入行會作用唔係真係咁大。發叔一把年紀都獲煲呔睇中，李業廣又有得留低，行會成員平均年齡由59歲變60歲，田少笑言自己冇年齡歧視。官場中人對行會新人選睇法不一，財爺鬍鬚曾反應可能有代表性，記者問佢點睇呢班新貴，佢粒聲唔出，指住自己雙眼，可能叫人放長嚟睇啩。
mailto:[email protected]