周柏豪笑說：「玩攝影在媽咪年代是件潮事。」那今天呢？在所有媽咪都懂得用手提電話拍攝的數碼年代，人人影得開心人人都是攝影發燒友，攝影從未落伍過，當中改變只有越趨講究。一個美麗夕陽的下午，初哥柏豪跟大師哈林談得興起，爆出一句：「愛上攝影，因為相片懂得說話。」
記者：許維雅
攝影：梁細權
MakeUp：JessicaChan
Hair：Cliff@HairCorner
周柏豪
2004年開始愛上攝影，一愛不能自拔。最近機不離手的是NikonD300，最難忘與媽咪一起去下白泥影日落，「開頭塞車，之後俾歌迷捉住合照，但太陽就快落山，最後叫歌迷日落後同一地點等補影相，嗰次既興奮又緊張，仲開心過去旅行。」
饒哈林
1989年加入攝影師行業，後自立門戶開公司，曾為LV、GUCCI、Canon、PCCW及Nike等多個大型品牌攝影，最常用相機是CanonMARKII。最難忘跟白雪仙合作拍攝《帝女花》海報。公司今年踏入十周年，十月將有展覽回顧這十年來的作品。
H=饒哈林
P=周柏豪
記=記者
玩攝影唔算嘥錢
玩儍瓜機，影Snapshot已成大眾玩意，怕的只是沉迷，擁有第一部單鏡反光機，又會心思思花幾千至過萬元買鏡頭、花幾百元買濾鏡腳架，若兼玩古董相機，花費肯定嚇怕人。面對靠攝影維生的專業攝影師哈林、業餘初哥柏豪，我只輕輕一句：「玩相機都幾花錢。」即引來兩位男士異口同聲：「唔算。」
P：其他男人嘢仲貴，我鍾意車，改車、噴油、換零件貴好多，玩車仲嘥錢。
H：講男人嘢，玩錶玩車玩Hi-Fi仲大件事啦，我鍾意儲錶，儲錶仲多學問，又容易買錯錶，影相易玩十倍。
P：我鍾意影相係因為我媽咪，佢嘅年代，踩單車、彈結他同影相都係潮物。有次搬屋，居然俾我搵到部古董菲林相機，我一見就好鍾意，攞咗嚟用，𠵱家成為家傳之寶。後來，我買咗部差唔多型號嘅RICOHXR1代替，都係$500左右，投資唔算大。
記：做攝影呢行，投資大喇啩？同埋成唔成功都係幾極端嘅事。
H：係，好極端，可以好慘無飯開，可以人人爭住叫你影相。我叫好彩，起初淨想做個好攝影師，出唔出名唔敢諗，做好自己先。出名需要好多人同事配合，接Job要好多人畀機會，今年接到滙豐銀行嘅Job好開心，呢個係我上年嘅Wish，今年實現咗，滙豐係每個攝影師心目中嘅目的地，好似Canon都係，Nike又係……
P：係呀，等於我以前打籃球、做模特兒嗰陣，都覺得Nike係目標，拍到Nike廣告係一種認同。
H：我算好彩，有機會影到好多心目中嘅Superstar，好似KobeBryant，難得Nike肯畀機會我。咁當然，自己都付出過好多，起初好慘㗎，要爭銀行好多錢，我哋自僱人士，向銀行借錢又艱難，開Studio又要買好多貴價器材。好多嘢，真係成功咗之後先可以諗，無錢唔可以諗Lycra、Technika呢啲相機，初初出來自立門戶，由細細間Studio開始，要求雜誌畀機會你影相，呢個係每個攝影師必須經歷嘅階段，我都艱辛咗十幾年先有成績。
P：我都有諗過做攝影師㗎，因為我真係有好大興趣，我都諗過會好難捱，但無諗過要捱十幾年囉。
H：好彩咪捱幾年囉，我間公司開咗三、四年，勉強見到岸邊，但仲未游到埋去，不過由做助手計起，我真係捱足十幾年。會唔會嚇怕你？柏豪。
P：唔會㗎，都仲係心思思㗎。
向國際級大師進發
有錢在手當然花得起，未紅前的哈林，亦試過不吃不穿，只為買部專業用的135機，柏豪也不介意用一半身家買心頭好，肯犧牲全因相片的魔力。
H：攝影好好玩㗎，有乜工作開心得過日日對住靚人靚景靚事，令你日日興奮，又賺到錢，又係你鍾意嘅嘢，幾難得。當然，賺到錢係之後嘅事，我都試過唔食唔着，死慳爛慳買第一部135專業用相機F3，阿媽日日煮定飯，等我可以儲錢，我真係多謝佢支持。
記：呢一行要賺錢，好睇出唔出名，好睇多唔多同明星合作，海鮮價到不得了。
H：無錯，攝影師名氣絕對同明星掛鈎，你越多機會同巨星合作，叫價可以越高，出名攝影師叫價幾十萬都得；無人識，咪接幾百蚊一單嘅Freelancejob，係好海鮮價㗎。
P：咁都要你有實力，啲Job做得好，人哋先有信心畀你影啫。
H：當然啦，成功要好多方面配合，攝影呢一行，你個Branding要做得好，就好似名牌一樣，要人哋覺得你係名牌攝影師，人哋先會畀機會你。我都仲等緊機會，機會每日都要去爭取，柏豪話當我係目標，我嘅目標係衝出香港，成為國際級攝影師，MaxVadukul、SarahMoon同StevenKlein都係我偶像，係我嘅目標。
記：你覺得佢哋成功喺邊？
H：成功在影嘅相有種魔力，你一見到佢哋啲相會大叫：「嘩，好靚，真係好靚。」
P：一張靚嘅相會講嘢㗎。
H：係呀，係呀。
P：望到張相，你會聯想背後嘅故事，延續好多幻想。你話攝影呢行投資大，睇你點睇，就好似細個買玩具咁，你有$40零用錢，會用$20去買個搖搖，你鍾意就無辦法㗎喇，好難計算，亦唔會計較。好彩我媽咪同老闆都支持我，知我鍾意影相，都有送相機畀我。
H：我嘅原動力就係國際級攝影師MaxVadukul，幾年前睇《國家地理雜誌》介紹過佢，佢話：「人要有堅決嘅心，你啲嘢係得，始終會有人賞識你嘅一日。」之後我一直向呢個目標進發，當然最感激嘅係How2work嘅Howard同我太太支持，上年我生日，我太太仲Sendemail畀我偶像Max，佢真係有回Email，仲送咗個親筆簽名畀我，我開心到不得了，希望可以同佢保持聯絡。嚟緊展覽我會邀請佢合作，睇吓可唔可以Dreamcometrue啦。
放毒連累人
時下興Snap、玩Mood，硬生生光猛猛的相片，可能不及半黑不白的照片有情調、受大眾吹捧。何謂成功難定斷，即使手法有異，但每個攝影師總覺得自己的作品最好。
H：影Snap同專業打燈呢兩類相片，唔可以拉埋嚟講，Snap放好多攝影師本身嘅情感落去，好似美國攝影師BruceWeber，淨係玩Snap都好靚，都可以做到《Wmagazine》台柱，廣告相一定要識用燈，兩者唔同市場。
P：攝影有種控制唔到嘅心癮，即使你放低咗，你又會心思思睇番吓啲相，跟住又會拎起部相機。呢種心癮好多時會連累人，其他人會好易受你感染有埋心癮一份，你又會開心，因為多個人同你有話題有共鳴。
H：你連累好多人咩？
P：係呀，洪卓立呀，一齊啱玩嗰班。
H：你知唔知早幾日邊個打電話畀我，問我去邊度買相機？關楚耀呀，又係你放毒㗎？
P：哈哈，係呀，佢叫我陪佢買相機，佢想買Nikon嘛。
H：至於你話所有攝影師都覺得自己影相最靚，我唔係咁諗㗎，我仲有好多進步空間㗎。我鍾意睇雜誌，因為要知道呢個世界嘅步伐行到邊，藝術功力先可以不斷增強，好似《Huge》、《Num囗ro》、《Wmagazine》等，我會期期睇，未來目標係搞多啲展覽，今年準備搞展覽慶祝十周年，令更多人認識我。雖然行內人個個識我，但我要普羅大眾都識，要個名入屋，最好連阿媽都識我，咁先叫成功，就好似前輩葉青霖咁。
P：係呀，葉青霖，我阿媽都識呀。
H：我當然想再貪心啲啦，最終目的地係紐約，每個攝影師嘅夢想。
P：我就唔敢諗到咁長遠，我每晚一有時間，上網狂睇人哋啲相，自己摸索人哋點可以影到咁，啲構圖點攞角度。同朋友研究，自己又有機會試到，已經好滿足。
柏豪攝
柏豪眼中最性感的女人是鄭融，「佢好Charming，有啲女人係靚，但見得多會無感覺，但次次見到鄭融都一樣咁吸引，好易影到佢嘅性感。」
哈林攝
哈林：「印象中最性感嘅相，係輯唔同階層老人家Styling相，有高雄叔、有樓下車房阿伯。」 http://www.glamfab.com/
